fbpx
مونتيسوري مصر- تقدمها مروة رخا

حاسة ان حبيبى طفش منى

 
 
 
أنا أنسة عمري 36 سنة وأنا مش من نوع البنات اللي تعرف تلف شاب وتوقعه وتخليه يتجوزها حبيت كتير بيني وبين نفسي لكن ما كانش عندي فكرة أعمل إيه وطبعا كل مرة كنت باخد صدمة متينة وازعل واتقهر على جوا وما ابينش لحد لما كان عندي 32 سنة جالي سرطان ثدي من ساعتها بعد ما كنت ماشية جنب الحيط حقرت نفق جوا الحيط وبطلت حتى الحب بيني وبين نفسي

لغاية ما اترقيت في شغلي واتنقلت فرع تاني وبعد سنة من النقل لاحظت ان في زميل معايا لطيف معايا … اتكلمنا و صارحته بحالتى قال انه مش فارق معاه و هو كان خاطب و فسخ و رفض يقول الاسباب …. وكمان طلع اصغر مني بسنتين وبرضه مش مهم

عيشني اسعد ايام حياتي لمدة شهرين وكان حبي ليه طبيعى (ح تعرفي بعدين اللي مش طبيعي)

وبعدها اتغير بشكل فظيع يكلمني قليل او ما يكلمنيش خالص وكل ما يعمل كدة أتجنن وبدل ما كنت باكلمة مرة في اليوم بقيت اكلمة 300 مرة وبعد ما كان بيتحايل عليا علشان اقابله بقيت انا اللي اتحايل عليه وكل اللى كان بيقوله انا مخنوق انتي مالكيش ذنب سيبيني ولما اروق ح اكلمك …. هو يقول كدة وانا طبعا اموت من الرعب دا انا ما صدقت لقيته (المشكلة اني كنت باقوله اني ما صدقت لقيتك وانت احسن حاجة حصلت لي وانك وانك لدرجة انه مرة وهو سرحان وقع بلسانة وقال انا ما باحسش اني كبير غير وانا معاكي والكلام دا قاله في الفترة اللي كان مخنوق فيها وبيبعد عني) المهم من كتر الضغط بعدت عنه وانا معتقدة انها النهاية

 

بعد 37 يوم من بعدي كلمني ورجعنا تاني بس بقة انا بقيت زي المجانين باغير عليه بجنون بكلمة بجنون بالف وراه في كل حتة علشان اقفشة متلبس مع اي حد لغاية ما لقيتها الله اعلم في حاجة بينهم ولا انا الي دماغي صورتلي ده هما زمايل ويعرفوا بعض من قبل انا ما اتنقل للفرع دة وبعدبن هو بدا يدخل هالة الاكتئاب تاني بس قبل ما ابعد المرة اتصرفت تصرفات مجنونة خنقته خليته اول مرة يزعق فيا انا كنت باتعمد اضغط عليه لحد الاخر علشان اشوف اسوأ ما عنده علشان لما ابعد ما اندمش
واجهته في حاجة بينك وبين فلانة زعق في وشي انتي بتقولي كلام غريب انا ما باحبش حد

 

 

وكنت ح اموت من الغيرة خصوصا انها صغيرة ومايصة وبتعرف ازاي تلاعب الرجالة وتوقعهم …..بعد كل دة ما قدرتش ابعد وبعد 51 يوم كلمته رد عليا كويس (عمري ما طلبته ومت ردش عليا ) وطلبت منه اخرج خرجني وكان ظريف اوي معايا بس ما طلبنيش من وقتها من 3 ايام انا مش عاوزة اسيبه لاني باحبه جدا 
انا نفسي اتعلم الحركات اللى البنات بتعملها علشان تعلق الرجالة بيها وياخد خطوة الجواز خصوصا في حالتنا دي هو طالع من صدمة

 

 

 
———————————- 
يا حبيبى قلبى .. دا انتى حالتك حالة
 
 
بصى
انا مش مقتنعة بموضوع الحركات اللى بتوقع الرجالة دى
 
انا مقتنعة ان الراجل الصح هيجى لوحده و هيقعد فى حياتى بمزاجه
 
و لكن بما ان انتى عايزة الحركات دى
 
فى كتاب اسمه
Why men marry bitches
 
Bitches 
مش مقصود بيها عاهرات من بتوع النواصى
هى مقصود بيها البنات اللونة اللى بتعرف تلف الراجل حوالين صباعها
 
انا ما قريتش الكتاب لانه ضد قناعاتى الشخصية
لكن فى ناس كتير قروه و قالوا انه فيه اللى انتى بتدورى عليه
 

 

 

——————————–

هاي مروة

شكرا على ردك عليا

انا قريت الكتاب ده بس المشكلة فيا انا لايمكن اقدر اكون غيري انا عفوية واللى في قلبي على لساني ومش باعرف الف وادورعاوزة اخرج باقول طس انا عاوزة اخرج

عاوزة حضن باقول طس انا عاوزة حضن (تروماي لو جاز التعبير)

لكن كل الناس اللي عرفوا الحكاية نصحوني اعمل حركات علشان انا خليته يملني

انا متأكدة انه مش بيحبني زي الأول وممكن جدا يكون بطل يحبني بس هو حد محترم ومش عاوز يكسفني مثلا ….وانا اللي ملقحة جتتي عليه ……… ولو اني لما باخرج معاه بعد الحاح مني طبعا لانه على طول مشغول بيكون لطيف وحنين وبيدلعني ……. بس وهو بعيد على طول مشغول … أول ما عرفتة من سنة كان طول فترة بعد الظهر مع اصحابة لكن دلوقتي كل ما اكلمه الاقيه مرهق وحواليه دوشه بس مش بيرضى يقول هو بيعمل ايه

المهم انه بطل من زمااااااااان يقولي انه بيحبني ولما بسأله بيقولي امال باكلمك ليه أو امال باخرج معاكي ليه

وعمري ما اسأله على حاجة ويرد مباشرة وانا حمارة زي ما باعمل كل حاجة طس باحب كل حاجة تتقال لي طس والله ما بافهم باللف والدوران

انا خايفة يكون بطل يحبني بس انا متاكدة اني لو اتصرفت صح من غير عشوائية ممكن أرجعه تاني

انا مبدئيا بطلت الغيرة العامية

وبطلت اتحايل عليه في حاجة واقعد الح (مملة جدا

أرجوكي دليني أعمل ايه علشان اخليه يرجع يحبني وينسى اني كنت انسانة مملة وزنانة

على فكرة ساعات من كتر زني وهو في عز انشغاله كان بيقولي خلينا صحاب أحسن فطبعا انا كنت بازن زيادة

في مشكلة كمان اني بالنسبة له كتاب مفتوح يعني عارف رد فعلي على كل تصرف بيعمله لكن ساعات لما رد فعلي بيكون مش متوقع هو بيبقى ح يتجنن

يعني مثلا يطلبني انتي فين -هو عارف اني دلوقتي لسة مخلصة كورس فأرد

انا في الحتة الفلانية ومروحة

انت فين

يقوم يقولي انه في مكان قريب قوي مني)

أقوم انا اتحايل عليه يجي يروحني

لكن مرة كنت تعبانة جدا فما قلتش تعالى روحني

فقالي اجي اوصلك انا قريب منك

قلت له لا انا ح اروح لوحدي

تاني يوم الساعة 7 الصبح طلبني وسالني ليه مارضيتش اروح معاه

مرة ثانية كان مغلس عليا وبعدين طلبني فما ردتش عليه ثاني يوم قعد يلف ورايا طول اليوم علشان يعرف ما رديتش ليه

ولو كلمني ولقى التليفون مقفول يبقى ح يتجنن ولازم يعرف انا كنت قافلة التليفون ليه ومرة هددني لو ما قلتش انا قافلة التليفون ليه ما ازعلش بقى لما يبطل يطلبني

ومرة قلت له انا كنت نايمة انت كنت عاوز حاجة قالي ابدا انا ايدي جت على الزرار غلط لأنك اخر حد كلمني

مع ان تليفوني كان عليه

6 missed call notification

يبقى بزمتك دا عاوز حركات ولا ايه

——————————————

 

ما هو لو انتى مش بتاعة حركات و اللى فى قلبك على لسانك يبقى الكلام مش هينفع
 
كل اللى انتى ممكن تعمليه انك تبعدى و تشغلى نفسك و تديله مساحة يدور عليكى
 
حبى نفسك و اهتمى بعقلك و هواياتك و هو هيجرى وراكى
 
لكن طول ما انتى فاضية و مركزة معاه كل ما هو هيزهد فيكى

 

—————————–

والله حاولت كتير ابعد بس بيوحشني وباتجنن لما بيقدر يقعد كل ده مايسالش عليا

بس انا عاوزة اعرف رايك في تصرفاته انتي قلتي قبل كده ان ممكن حركاته دى تكون اشارة انه خلاص مش عاوزني ولا هو مخلول مع العلم انه واحد دارس علم نفس وممكن يكون بيلعب بيا لما لقاني متعلقة بيه

ساعديني انا مش قادرة اوصفلك مش باحس بطعم اي حاجه في الدنيا الا وانا معاه

ولما بابعد بتبقى حالتي بالبلا

 

 
————————————-
هو انسان طبيعى زى و زيك
 
لما الحاجة بتزيد عن حدا بتتقلب ضدها
 
الحب الزيادة زى الشاى المعمول بعشرين معلقة سكر
الاهتمام الزيادة زى زن العيال
السؤال الزيادة زى المطاردة
التعلق الزيادة زى الكورة الرصاص اللى بيغرقوا بيها الجثث فى البحر
 
الغلط مش عنده
انتى اللى لازم تتغيرى
و تشغلى نفسك
و تبقى فى فى حياتك اهتمامات و انشطة تسعدك بجد
 
انتى رميتى عبئ سعادتك و استقرارك النفسى عليه و دا مرهق لأى شخص
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”