عايزة اتجوز

ازيك يا مروة .. يارب تكونى بخير وفى احسن حال .انا بحس بسعادة وتفاؤل وامل لما بشوفك على التليفزيون. ماشاء الله ربنا يسعدك . .انا محتاجة اخد قرار ومش عارفه اتكلم مع حد ونفسى اسمع رأيك .

انا عندى 26 سنه ..بشتغل مهندسة فى ..الحمد لله من اسرة مستورة بسيطة .. انا ببساطة عايزة اتجوز .تقريبا محدش اتقدملى .فيه ناس لمحت بالجواز من معارف والدتى لكن هى عارفه انهم مكانوش مناسبين ومرحبتش بأى موضوع .عايزة اتجوز علشان حاجات كتير بدون ترتيب انى ابقى ام ، يبقى فيه راجل فى حياتى ..ايوه بكل ما تعنية عبارة "يبقى فيه " ،علشان امى ما تحسش بخيبة الامل ،علشان ما يكونش جوايا طاقة سلبية من احساسى بالعجز ،علشان نظرة المجتمع ليا .علشان اثق بنفسى .

انا صحيح اتعلمت .. عندى اسرة ..مش محتاجة ماديا ..بشتغل وناجحة فى شغلى .. لكن من غير جواز انا كائن غير واضح الملامح ..وجودى بيتحقق بوجود شريك بغض النظر عن حبه ليا المهم تقبله ليا .هاتقولى انى معنديش ثقه فى نفسى هتيجى منين ..انا محدش بيتقدملى ..محدش فكر فيا كزوجة ..محدش اتمنانى ..التلميحات اللى وصلت لوالدتى من اهل الشاب مش من الشاب نفسه . انا مقتنعه ان " كل فوله ولها كيال " وان بكل عيوبى ووميزاتى ممكن حد يتوافق معايا .

بدون الدخول فى تفاصيل احنا اسرة منطوية .. من البيت للشغل ومن الشغل للبيت ..رغم اننا اجتماعيين فى شغلنا .. لكن مفيش علاقات بره العمل ..انتى عارفه ان البنات والولاد بيرتبطوا بسهولة ببعض فى الجامعة .. تقريبا مفيش حد حاول معايا . رغم انى ببساطة من ايام ثانوى بتعامل مع الولاد فى الدراسة ومفيش كسوف بتعامل عادى ..اقتنعت بفكرة العلاقة الكاملة وهى انى مدخلش فى علاقة حب وكلام وهمسات ونهنهة بدون التزامات يعنى انا عايزة زواج مش بس حب.

ومصرحتش بالفكرة دى لحد .. المهم خلصت ايام الكليه ..كنت بعمل دارسات متخصصة واتعرفت على مهندس كنا بنتكلم فى الدراسة مكناش قابلنا بعض .. للاسف كان على الميل والماسنجر … تطور الكلام ..اتعلقت بيه .. قاللى بحبك ..شفته مرتين يكاد يكونوا صدفه .. بعد كده اسطوانه اننا لازم نعرف بعض .. احنا مش مناسبين لبعض .. انا اهلى عايزين يجوزونى بنت عمى .وخلصت الاسطوانة .. انا مش مراهقة للدرجة بس انصدمت .. تقريبا كان اول حب ليا .. الحمد لله كان بدون خسائر على الاطلاق ..البيه كان دنجوان .

لو نسيناه هوه وفكرت فى نفسى .. اقل شئ للجدية على المواقع دى هي صورتى ..لكن بعد كده هعمل ايه .. هأقول لاهلى ايه لو طلب يتقدم..مش هاقدر اقولهم عرفته ازاى وقبل كده لو حب يشوفنى فى مكان عام …وده حصل والشاب كان مناسب وقلت اهو نشوف بعض لان اولا ممكن ماعجبهوش وعلشان اعرف منه شوية تفاصيل .. اتقابلنا فى مكان عام ..كان محترم ومؤدب لكن بالتفاصيل عن حياته لقيت انه منفصل عن اسرته مش بس علشان هوه بيشتغل فى القاهرة وهما عايشين فى محافظة بعيدة لكن هوه مشغول بشغله لدرجة انه مشافهمش من شهور طويلة ..زى ما قلتلك احنا اسرة منطوية .. انا نفسى الاقى عيلة اكبر وهو كان هيبقى مجرد فرد جديد فى عيلتى وبس غير انى عرفت انه معندوش امكانيات ومستعد ان الخطوبة تطول سنين وانا مش مستعدة انى ارضى بكده لان كل يوم هيزود الضغط عليا وهتنازل عن حاجات كتير وهتبقى الجوازة مش متكافئة .

مش عارفه اعمل ايه ؟ انتظر ولا اعمل ايه … مشتاقة لحضن رجل ولمسة طفل ومش عايزة اظلم نفسى واقلل من نفسى .

انا اسفه انى طولت عليكى

——————————————-

 اهلا يا مشمشة

اولا

موضوع مواقع الجواز دا تنسيه خالص

الاعلان اللى على موقعى دا جوجل اللى حطته مش انا

بلاش
ارجوكى بلاش

اما موضوع الجواز و ان حد يعجب بيكى و كدة

انا كنت اتكلمت فى الموضوع دا كذا مرة

اسمعى كدة و بعدين احب اسمع رأيك

http://www.marwarakha.com/index.php?categoryid=41&p2_articleid=497

http://www.marwarakha.com/index.php?categoryid=41&p2_articleid=491

http://www.marwarakha.com/index.php?categoryid=41&p2_articleid=468

http://www.marwarakha.com/index.php?categoryid=41&p2_articleid=435