ازيك مروه عامله ايه؟ انا كتبتلك بعد ما سمعت عنك كتير كلام جميل جدا وكنت متردد اعرض مشكلتى وهى
انا متجوز من حد قريبتى وكان الجواز الى حد ما تقليدى بس مر ببعض من الحب و الموده ما بينا الكلام ده كان من 4 سنين والحمد لله ربنا رزقنا ببنوته زى القمر ولغاية هنا الكلام زى الفل المشكله بقى فى ايه ؟ انى مراتى مش بتحب اوى العلاقه الزوجيه واتكلمنا اكتر من مره فى الموضوع ده وعلى طول ردها انا كده ومش بحب اعمل كده كتير وبعد مناقشات ومداولات كتير اقتنعت اخيرا اننا نروح لدكتوره نساء وكان رد الدكتوره انى الموضوع عادى جدا ومفيش اى مشكله جسديه خااالص بس هى كده طبيعه جسم وغيرت كل حاجه علشان اكسر الروتين علشان احببها فى العلاقه بس للاسف برضو مفيش فايده اتكلمنا كتير وزعلنا كتير كاداه ضغط بس برضو مفيش فايده الرد على طول بيكون (انا كده ومش بحب كده اعمل ايه؟ غصب عنى)والمشكله دى طبعا ادت الى برود فى الحياه الزوجيه بصفه عامه بطريقه فظيعه
———————————————–
هى مشكلة عويصة فعلا
بس مش تخصصى خالص و خبرتى فى النوع دا من المشاكل نص كم
لكن
اللى أنا افهمه ان فى اغلب المشاكل اللى من النوع دا بيكون السبب عاطفى و عقلى
يعنى فى راجل مثلا بيحسس مراته انها نكرة
او انها مش مهمة
او بيسخر منها فى السر او العلن
او بيبخل عليها بالمجاملة و الاطراء
و بعدين يتوقع انها هترحب بيه فى السرير
انا مش باقول انك بتعمل كدة
انا بس باديلك امثلة من الحاجات اللى بتكون فى العلاقة نفسها و بتنعكس سلبا على العلاقة الجنسية
ممكن طريقة العلاقة الجنسية نفسها
الست بتثار من عقلها و من ودانها مش من اعضائها التناسلية
و ممكن تكون حاجات هى مكسوفة تقول عليها
زى ريحة بق و لا ريحة عرق و لا حاجة من الحاجات دى
طبعا فى ستات تانية تعرضوا لجريمة الختان و فى الحالة دى انا مش هعرف اقول لك تعمل ايه – و تمنى انك ما تعملش كدة فى بنتك
انا ما عنديش مانع اسمع من مراتك و احاول اقرب وجهات النظر
وممك تروحوا لدكتورة هبة قطب
هى متخصصة فى النوع دا من المشاكل
