هاى ازيك يامروة كنت عايز اسمع حلقه عن موضوع فرق السن
وايه فرق السن المناسب لو الراجل اكبر يكون الفرق المناسب قد ايه
ولو المراء هيه اللى اكبر يكون الفرق المناسب قد ايه
مع العلم انى معجب بالمديرة بتاعتى فى الشغل
وهى بتبادلنى نفس الاعجاب وفرق السن حوالى 3
4 سنين ومستواها الاجتماعى بتعها اعلى منى
من حيث الماده ومن حيث المنصب الاجتماعى
مع العلم انها مطلقه او ارملة وكنت عايز اعرف رايك قبل
اما اقرب منها اكتر وانا سنى 26 وهى تقريبا 30
31
وهى مش مديرتى مباشرا يعنى مافيش بين احتكاك بينى وبينها كتير
بس انا بميل ليها وهى بتميل ليا
مع العلم انا بابا ياه اكبر من مامتى ب 10 سنين
وصاحب بابايا ه متزوج واحدة اصغر هوه منها ي 15 سنه
وعايشن مع بعض ومشفتش او سمعت عن مشاكل بينهم
عايز رايكو ضرورى واراء الناس فى الموضوع ده
واللى مبرداش يتجوز واحده اكبر منه على اى اساس رافض المبدا ده
واللى المراءة الى بترفض واحد اصغر منها على اى اساس ومبدا بترفضه ليه
مع انى لما كنت بسئل صحابى عن الموضوع ده الاقيهم رافضينه المبدا بس ردهم
ماكنش بيبقى مقنع اكنهم لما اقلهم الموضوع ده اكنى قولت حاجه عيب وحرام
وبحيس انى لمست معتقداتهم وافكرهم اللى وراثوها وحفظنها وبدفعوه عنها
وخلاص بس هما بيدافعوه عن معتقد وخلاص بغض النظر عن انه صح او غلط
ناس حافظة مش فاهمه
——————————————————
بص يا مشمش
انا رأيى فى الموضوع دا يتلخص فى كلمة واحدة
التوافق
ممكن تلاقى راجل اكبر من مراته بعشر سنين لكن لايقين على بعض … هى عاقلة و راسية و هو شاب و بشوش و روش و الحياة ماشية
ممكن تلاقى واحد تانى نفس سن مراته و هى شكلها زى جدته و لا هو تصرفاته زى توت عنخ أمون
ممكن تلاقى واحد فى ال40 بيتصرف زى المراهقين و ممكن تلاقى مراهق شايل مسئولية بيت كامل بمنتهى الفخر
ممكن تلاقى واحد متجوز واحدة صغيرة سنا لكن روحها عجوزة
و ممكن تلاقى واحد متجوز واحدة اكبر منه لكن الفرق مش باين لا فى الشكل و لا فى المضمون
الموضوع كله موضوع توافق
طبعا الراجل او الست اللى بيهملوا فى عقلهم او فى جسمهم بيبان عليهم العجز اسرع من الناس اللى عايشة حياتها و مستمتعة بنعم ربنا
فى حاجة كمان
مافيش ضمانات
لا حد عارف مين هيموت قبل مين
و لا مين هيعيش اكتر من مين
و لا مين هيطلق مين
و لا مين هيتجوز على مين
ما فيش اى ضمانات لأى حاجة
موضوع المستوى المادى و الاجتماعى دا موضوع مهم
اهميته مش قدام الناس .. يولعوا
اهميته بينك و بينها و قدام بعض
لو انت هتحس بالضألة جنبها يبقى بلاش
لو هى هتتعلا عليك يبقى بلاش
موضوع بقى انها مطلقة او ارملة
دا موضوع بينك و بين نفسك اولا .. انت هتقدر تتعايش مع الوضع دا و لا هتغير و تقارن و تعيش افلام
و فى شق تانى مع أهلك
و دا يمكن يبقى صعب شوية بحكم المجتمع و العادات
بصوا هنا كمان - You might like those too
