ازيك يا مروه …انا من اشد المعجبين بيكي و بارائك و اخلاصك !
انا مش عارفه ابتدي منين لكن انا هحاول اختصر و ادخل في الموضوع علطول
انا من 4 سنين كنت بشتغل في شركه و شفت واحد زميلي من اول ماشفته شدني جدا و احتفظت باعجابي ده لنفسي المهم عرفت من واحده معايا لسه متعرفه عليها برضه (لاني كنت جديده عليهم ) المهم عرفت انه دفعه بعدي بسنتين فا شلت الموضوع من دماغي خالص
المهم بعد شهر من وجودي في الشركه كلمني علي الموبايل عن طريق بنت تانيه معاه في نفس القسم….كان ذوق و محترم جدا و هادي وشدني اكتر و طلب مني اننا نكون اصحاب …رفضت لاني كنت مشدوده جدا ليه و خفت الصداقه دي تزود الموضوع عندي انا اكتر خصوصا لما قالي جمله غريبه مخدتهاش بنيه وحشه ساعتها لما قالي "انت طبعا بتسالي نفسك انا عايز ايه , انا مش عايز حاجه غير اني اشوفك فرحانه , وانا مش بتاع جواز " قلته اوك شكرا ليك احنا ممكن نكون اصدقاء فعلا و نتكلم في الشغل قدام الناس عادي مفيش داعي ندي الموضوع شكل تاني يتفهم غلط لو حد عرف اننا بنتكلم في التليفون…خصوصا اني لاحظت انه مبيكلمنيش خالص في الشغل…مجرد صباح الخير و سلام
المهم ,عرفت بعد كده بعد شهرين انه بيكلم نفس البنت اللي قلتلك عليها في اول كلامي و انهم قريبيبن من بعض جدا ,هي علطول بتكلمه في التليفون سواء علي الموبايل او علي اكستنشن بتاع الشغل , مجاش في دماغي لحظه انهم ممكن يكونوا مرتببطين خصوصا انهم مش ستايل بعض خالص و هو امور و جذاب و هي مش حلوه خالص بس دلوعه
المهم اكتشفت بالصدفه برضه انه كان بيقولها نفس الكلام بالظبط اللي كان بيقولهولي (في الفتره اللي كان بيقنعني فيها اننا نتكلم في التليفون ) و انا مكنتش موافقه برضه يعني بقتنع في ساعتها و بعد مقفل التليفون برجع في كلامي و اقول لاء المهم كل كلمه قالهالي بالظبط زي ما هي قلتلي مع اختلاف حاجات بسيطه !
طبعا انا اتصدمت لما عرفت كده خصوصا لما عرفت انهم كانوا مرتبطين و دخلوا في موضوع ارتباط بس محصلش حاجه علشان -علي كلامه- اللي هي قالتهولي انه مش هيقدر يكمل رسمي علشان باباه عايزه يعمل ماستر الاول (كلام عجيب و حجج فارغه) استغربت اوي و مفهمتش حاجه لاني كنت مصدومه اصلا بفكره انهم يكونوا مرتبطين ده غير كلامه لما قالي انا مش بتاع جواز و اصراره انه يكلمني !! طيب ازاي !و كمان المرات اللي كان بيكلمني فيها كان مهذب معايا جدا و كان بيوحيلي انه مرتبط بيا و اني لازم اقوله علي اننا نرتبط كلامه كله كان بيوجهي في الاتجاه ده و فوجئت بعدها بيقولي انه لسه خارج من موضوع ارتباط و اكتشف انه ميقدرش يرتبط دلوقتي الا بميزانيه معينه و ان مفيش حاجه اسمها حب و ان الفلوس هي الاساس !
كلام غريب من واحد يبدو من صوته و تصرفاته انه رومانسي جدا و بيحاول دايما يوصلي كده لدرجه اني اول مره اعرف معني
معاه هو و اول ماقلته اني حاسه كده قالي ايوووووه بالظبط كده soul mate
تفاصيل كتير انا عارفه بس مش قادره اختصر حاسه انك لازم تعرفيها …المهم انا طبعا بعد معرفت الحكايه دي و الكلام المكرر و الارتباط الغريب بالبنت دي قلت خلاص ده بيلعب و بيستعبط بيكلم كل واحده لواحدها و مفاهمها ان هي المهمه بالنسبه له قلتله
شكرا انا محبش اني اكون واحده من ضمن صديقات بتكلمهم …عندك فلانه و علانه بتكلمهم خلاص خلي العلاقه تاخد شكلها الطبيعي و نتكلم كزمايل في الشغل و بس
و من ساعتها و انا مكلمتوش خالص و كنت حاسه بمرارة فظيعه و اني مجروحه جدا فاتفقت انا و البنت دي عليه و كل ما نشوفه نبصله باحتقار
الكلام ده كان في خلال 6 شهور من ساعه ما رحت الشركه… بعدها ب 3 شهور كان بعتلي ايميل منظم جدا و واضح و صريح انه عايز يتقدملي و كان مفصل جدا و كنت بعيطت و انا بقراه
المهم مكنتش مصدقاه خالص و قالي اديني فرصه اثبتلك اني جد خصوصا لما عرفت ان البنت دي لما طلبت منه يروح البيت رفض المهم جيه البيت فعلا و انا في حاله ذهول و اول حاجه قالها لمامتي انا مش هتجوز غيرها
و ماما حبته و ارتحتله جدا و حسستني اني شكاكه و انة كويس جدا و انا ظلماه
المهم بمجرد انه اتاكد مني اتبخر تاني لانه كان المفروض هيسافر تبع الشغل لمده سنه و كان قالهم عندي في البيت ان ظروفه كذا و كذا و انه جي يثبتلي حسن نيته…اه نسيت اقولك انه قالي قبلها في التليفون جمله -ضيقتني و قلقتني جدا- انه هيجي البيت كانه صديق جي يزورنا (ده علي اساس ان احنا فري مثلا ) و فقت لاني كنت متاكده انه كداب بس للاسف جيه فعلا
اتخنقنا تاني بعدها طبعا لما جيه موضوع السفر و متكلمناش مع بعض خالص لمده 5 شهور تاني …كنت كل ماشوفه في الشغل ابص في حته تانيه و اعمل نفسي مش شايفاه كنت مجروحه اوي بس كبرت دماغي و قلت خلاص
طبعا كان في ناس بتتقدم منهم صالونات ناس بتزونا و بالعافيه طلعت كده اي كلام و انا من جوايا رفضه الطريقه دي و مجروحه جدا جوايا
حتي كان في كذا حد في الشغل بس مكنتش مشدوده لحد فيهم خالص المهم
حصل بعد كده ظروف عندنا و زمايلي عرفوا في الشغل طبعا و حاول انه يجي يزورنا
و انا شكرته بس هو اصر انه يجي بنفسه و انا ساعتها كنت مسامحه الدنيا كلها لاني مامتي هي اللي كانت تعبانه و برغم اني كنت قبل الظروف دي بيومين بالظبط كنت سايبه الشغل الا اني رجعت تاني و طلب مني انه لازم يجي بنفسه المستشفي و جيه فعلا و طبعا فتح الموضوع تاني لانه كان شايف انه محتاج يبرر تصرفاته …شرح لمامتي تفاصيل كتير عن الظروف الماديه انه علي امل انها تتحل و دخل في تفاصيل عيلته اللي مستنيه تخلص قواضي الميراث و الافلام العربي دي انا كنت قاعده في الوقت ده مش معاهم اصلا و كان وجوده زي عدمه بالنسبه لي و كل اللي جوايا انت جي ليه !! عايز مني ايه تاني !
بعدها بيومين اتصل بيا و طلب مني العنوان بالتفصيل عايز يبعت ورد علي البيت قلته شكرا كتر خيرك كفايه انك جيت…و بعد اصرار طبعا وفقت و لما وصل الورد كلمته شكرته
و كان اخر كلام لي مع مامتي انه هيجي لما ظروفه تتحسن
و اتكلمنا في الموضوع تاني كله وقالي انا مش عارف اريحك ازاي… طلبت اشوف مامته و وافق علشان يطمني و اتقبنا بره- و كان ببايا رافض الفكره دي بشده- المهم قالت نفس الكلام اللي هو اول ما الظروف تتحسن هيجيلك في نفس اليوم
و انت مش مصدقاه ليه و الكلام ده و قولتلها انا السبب انه كان بيكلم بنت تانيه في نفس الوقت
المهم
تاني يوم لما رحت الشغل بعتله مسدج اقوله فيها انه كداب و انا مش مصدقاه خصوصا ان مامته شكلها صغير اوي بالنسبه لواحد في سنه و مكنتش مرتاحه و طلبت انه يجي نفس البارتشن اللي انا فيه و اديته كلمتين قلتله ان بنات الناس مش لعبه و انك لما تحب تضحك علي حد ميكنش انا !
و هو كالعاده ينكر الكلام ده و كان في بنت مسيحيه عارف الموضوع و كانت موجوده وقت الكلام ده اتضايقت جدا و قالتلي اني ظلماه و انه حد كويس جدا و ميستهلش مني كده و انا علشان شايفاه اتنين- بشخصيتين يعني- و علشان خفت اكون ظلماه فعلا حاولت اصلحه بس هو كان متضايق جدا طبعاو البنت دي ولعتها اكتر و قالته قدامي انت مش لعبه في ايدها و رجعنا منتكلمش تاني
بس في ختام اي خناقه يقولي انه عارف ان الكلام ده ملوش معني بس لازم تعرفي
مش هتتجوز حد غيرك و ان هو صادق في كل اللي بيقوله
و مفيش شهر و هو اللي ساب الشغل . حاولت اشيل الموضوع من دماغي معرفتش و كلمته تاني كان بيكلمني بتحفظ و اتكلمنا تاني مكالمتين كمان و خلاص و
و بعدها هو جابلي شغل بس بعيد عني جدا
و المفروض ان هو كان هيروح هناك بارت تايم بس انا قلتله اني مش رايحه و هو كمان قال انه مش هيروح
المهم اختفا تاني بسبب اهتمامه اللي بيقل اول ما يطمن من ناحيتي و قلت خلاص بقي كده كتير اوي و شلت الموضوع من دماغي لقيته كلمني من رقم غريب بعدها بشهرين و بيقولي ان ده رقمه الجديد و اني انا اللي نفضتله(خدوهم بالصوت) و بيسالني اذا كان ممكن يتصل بالليل تاني علشان عايز يكلمني في موضوع مهم قلتله اوك و بعدها بخمس دقايق كلمني و سالني اذا كنت لسه عايزاه و اذا لسه شايفاه كويس قلتله عادي ايه اللي اتغير قالي خلاص اوك انا هتكلم مع بابا و هكلمك بالليل
و لا اتكلم و لا الهوا ! انا مكنتش ساعتها بشتغل و كنت قاعده في البيت و دماغي بتودي و بتجيب المهم بعد استشاره احد الاقارب للاسف كلمته بعدها باسبوع قلته انت اختفيت ليه خير انت كويس قالي ايوة
طيب رحت فين اصل حصل مشكله تاني و بعد ما كنت فاكر ان الموضوع اتحل مع العيله رجعوا في كلامهم و مفيش فلوس و مكنتش عارف اكلمك اقولك ايه
و لقيته بيتملص تاني
رحت بعتاله 6 مسدج فيها كلام زي الزفت و انه انسان سئ و ان الناس كلها مخدوعه فيه حتي صحابه اللي فاكريه خام مخدوعين فيه و هو اكبر مخادع في الدنيا و الله يكون في عونهم
المره دي الوحيده اللي مردش فيها يدافع عن نفسه
طبعا بعد مهديت تاني و حكيت الموضوع لواحد زميلنا كبيرو متجوز -حكيتله من غير ما يعرف مين الشخص ده- للاسف حكيتله لانه سالني, اذا كان في حد في حياتي- في نفس الوقت اللي كنت ضعيفه فيه -مش عارفه انا صح و لا غلط
قاللي ده بيلعب بيكي و لو عايزة تتاكدي حاولي تكلميه و هو هيرفض و مهيصدق و فعلا كلمته قالي خلاص كفايه كده و انسيني ودي كانت اول مره من ساعه معرفته اشوفه ثاير بالمنظر ده قالي خلاص كفايه كده و انا عندي كرامه
قلتله انا كنت متعصبه قاللي الحقيقه بتبان لما بنتعصب لان اللي جوانا بيطلع حسيت ان خلاص مفيش فايده قلتله خلاص اوك و سلام
فؤجئت بعد الموضوع ده بشهور انه خطب مصدقتش طبعا بس طلع ان الخبر صحيح فعلا و انا كنت في حاله ذهول المهم اتضح ان الموضوع بجد و كلمته باركتله قولته انت المفروض معايا انا
قاللي انه ولا حاجه و انه انسان حقير او حاجه زي كده و قالي انه هيعرفني عليها قلتله مبروك و من ساعتها شلته من دماغي فعلا مبقاش بيجي في دماغي اطلاقا… اتضايقت في الاول بس بعدها علطول حسيت انه مش فارق معايا خالص
و خلاص الحمد لله خلصت من الكابوس ده بعدها بكام شهر كلمني و بيقولي انه مش حاسس انه مبسوط و انه مينفعش يكون حاجه غير انه يكون عبد و انه مقلش الكلام ده لخطيبته لان العبد مبيتجوزش بس(قلتله بس انت ببتجوز فعلا قالي ايوة انا هكملعلشان اريحهم) كلام غريب بيقوله من ساعه معرفته بس مكنتش بهتم بيه
زاد الكلام في الموضوع ده في الفتره الاخيره بيقولي انا عايزك تعامليني كعبد و ان الموضوع ده عند ناس كتير و انه مش مرض نفسي و انت طبعا يا مروه اكيد مشلوله دلوقتي و بتقوليي انتي ليه اصلا بتردي عليه او بتكلميه لحد دلوقتي !
انا باخده علي قد عاقله علي امل اني ارتاح و اعرف هو كان عايز مني ايه ؟ انا اللي صح و لا هو ؟ انا لللي ضيعته من ايدي زي مامتي و زمايلنا في الشغل بيقولولي
انا شايفه انه كان بيهزر و هما بيقولي لاء انا غلطانه وان انا بهدتله كتير و المفروض انه عندوا كرامه
مين الصح فينا يا مروه انا عايزة ارتاح بجد ….اللي يهمني في الموضوع ده اني اعرف انا صح و لا غلط !
نسيت اقولك
المضحك في الموضوع بقي انه اتجوز فعلا من شهر و كلمني تاني بيقولي نفس الكلام ! الحاجه الوحيده اللي مبتتغيرش في كلامه ! انا عبد و تحت رجليكي و الكلام اللي بسمعه و انا بضحك
الحاجه اللي متاكده منها في الموضوع ده انه بني ادم مش طبيعي…اللي محتاجه اعرفه منك هو كان عايز مني ايه بتسلي فعلا و دي حاجهجاحه جدا بالنسبه لي و لا انا اللي غلطانه و انا السبب انه ضاع الحمد لله ؟؟؟
حاجه مهمه احب انك تعرفيها عني …
انا مبعرفش ازعل من حد عموما مهما كان الحد دا و مهما غلط فيا و بسامح يعني هو او غيره بسامح برضه بنت او ولد مش فارقه لاني بحب احافظ علي نقاء قلبي من الكراهيه مش عارفه بصراحه بس انا كده مش عارفه ليه
حاجه تانيه …ان حياتي مكنتش واقفه عليه و كان في مواضيع في النص اثناء الفاصل و الخناق بس مفيش نصيب لان مكنش في حد مناسب اوي و ما زال لغايه دلوقتي مفيش حد مناسب
انا عارفه اني طولت عليكي اوي بس انا فعلا زهقت خلاص و عايزه اعرف انا صح و لا غلط
—————————
انتى بقى تقلبى الصفحة دى خالص
هو بحكاياته بمراته بميوله الجنسية بكل الكلام دا
لا تفكرى فيه بينك و بين نفسك و لا تحكيه لحد تانى اصلا
الحكاية خلصت
موضوع العبد دا
فى شخصيات
Submissive
و دول بيحبوا يتهانوا و يتذلوا و يتضربوا و يبوسوا رجلين و جزم الستات
Slaves
هو كدة و لا مش شغلتنا اصلا الموضوع دا
انتى بقى لازم تفوقى من الفيلم دا و تشغلى خلايا مخك بحاجة اهم
———————–
بالراحه عليا يا مروه و النبي
انا سؤالي هو كان عايز مني ايه اصلا؟؟
و هو سابني علشان انا السبب و لا علشان مكنش عايزني اصلا ؟!
انا شايلاه من دماغي و مبفكرش فيه خالص بس عايزه اعرف انا صح و لا غلط
و بعدين ميول جنسيه ازاي ؟؟ هو عمره ماتلكم في حاجه زي كده ؟؟!! ميقدرش اصلا
———————-
يا لوزة
I want you to read … google "slaves" .. google "submissive men"
و انتى هتفهمى
هو كان عايز ايه
هو كان عازك تبهدليه و تمسحى بكرامته الارض
علشان هو دا كيفه
——————-
Marwa,
Sorry , I know that I bothered you asking too many questions ….but , why ME ? and why did he MARRY ANOTHER ONE ?!! and why he still CONTACTING ME ? what does he expect me to do ?
SORRY ! but I need to UNDERSTAND, WHY DID HE BREAK UP WITH ME , in the first place ?!
هو كان بيقولي نفس الكلام اللي انتي كنتي بتقوليه بتاع امسحي بكرامتي الارض و هزقيني بس انا كنت بضحك علشان كلام غريب
ليه انتي مش عايزه تفهميني و ترد علي المشكله دي زي اسلوبك في اي مشكله بتجيلك ؟؟
ردودك عموما بتكون مفصله و بتفهمي صاحبتها دايما " ايه حصل ازاي "
يا ريت تقولي من فضلك علشان ارتاح
P.S.
I did google "submissive men" and it seems that it's all about **** !
————————————-
يا حبيبتى
فى حاجات انا ممكن ارد عليكى فيها
لكن فى حاجات تانية لازم انتى اللى تقرى عنها بنفسك
being submissive is a whole character not just about sex
being a slave is an attitude not an act
هو اتجوز الواحدة اللى فهمته
اللى هتعامله المعاملة اللى هو عايزها
هو انجذب لشخصيتك القوية الصارمة
و اتمنى انك تعامليه كدة و تفهمى طبيعته المختلفة
و لما دا ما حصلش
راح لواحدة تانية
ليه على اتصال بيكى؟
علشان انتى بتمسحى بيه الارض
بتحسسيه انه حقير و دنئ
