استاذة مروة
اولا بحييكى على كلامك ف كل كتاباتك والبرامج بتاعتك
ثانيا انا بجد تعبانة اوى وعارفة ردك هيكون ايه ف اللى انا هكتبه
انا تعبانة اوى اوى اوى
انا اترددت كتير انى اكتبلك المشكلة دى بس بجد انا من جوايا بتعب اوى
هبدأ على طول
انا مكتوب كتابى بقالى سنة وزوج المستقبل مسافر للبلد اجنبى
طبعا مش عايزة اقولك انا واثقة فيه اد ايه لأنه بيعانى مشكلة بشعة جدا
العادة السرية
يعنى م الاخر اتعود على حاجة معايا من على الوش او اى حاجة تانية مع نفسه او حتى فون سكس
طبعا ده كله بدأ بعد كتب الكتاب بفترة مرحلة رفض وزعل وخصام وبم ان انا بحبه وطبعا انا ف الاخر وافقت انتى مراتى وده مش حرام احنا خلاص هنتجوز ولازم ناخد على بعض عشان انتى دايما بتتكسفى
طيب وبعدين والحل
اكيد طبعا الحل ف الموضوع ده
انا من بيت كله عيب وده عيب
ممنوع يمسك ايدك ما مسكش ايدى غير يوم مالبسنى الدبلة على الرغم اننا ارتبطنا بعد علاقة حب جميلة جدا
كان كلها احترام وتقدير لرغباتى
مش عارفة اقولك بجد شخص مختلف جدا عن اللى انا عرفته
من الصورة الواثقة من نفسها لمجرد شخص شهوانى كل ما يكلمنى ف التليفون بتحبيبنى بتحبى كذا فيا انا بحب كذا فيكى كذا وحشنى
وطبعا النت والكام اقلعى
والبسى وانا مش مقتنعة بكل ده بس بعمله
طبعا انا عارفة ان مالهاش حل غير انى اسيبه بس انتى عارفة ده معناه ايه مطلقة واهلى ساعتها هيقولو طلاق ايه الناس تقول ايه وكلام من ده
انا اول مرة افكر ف حاجة لوحدى ماحدش بيفكر معايا كانت كل حاجة اهلى يفكرو وينفذو
حتى خطيبى ده برضه اهلى حطوه ف طريقى
مش عارفة انا بجد مش عارفة اوصل لحل
لو رفضته هيقولى انتى اتغيرتى وانتى اتزفتى
طب والحل
اه ما انا لما سافرت حد لعب بدماغك مع العلم انه شكاك ودى مشكلة تانية
انا محجبة ولبسى محترم جدا ومش بتزين يعنى م الاخر فتاة مثالية اى حد يتمناها وبقول ده عن ثقة
بس لفظة مطلقة لو انا طلبتها تفتكرى هقدر اتحملها ف المجتمع طب ولو اتجوزت العلاقة نفسها شكلها هيبقى عامل ازاى
هيسيبنى ويوروح يكمل لوحده
طب وبعدين
انا زهقت لأن ده كمان عاد بالضرر عليا لنه لما كان هنا عودنى على لمساته وانا بحس انى زى القطة المجروحة اللى هتموت على لمسة ايده
وانا الاحساس ده بيموتنى
انا بجد مش هقدر اتكلم اكتر من كدة
اكيد هتقوليلى ليه يا لوزة انتى كنتى صاحبة قرارك م الاول لأ يعنى لأ واخبط راسك ف الحيط طيب انا فعلا ما قدرتش اقولها
بفكر جوازى وحياتى هتبقى عاملة ازاى
هيتغير ولا انا اللى هلبس ف الحيطة زى ما بيقولو
اسفة على الاطالة
—————————————-
لأ يا لوزة
مش هقول لك كدة
انتى طرحتى كذا نقطة فى مشكلتك دى
أنا عايزة أجمعهم بس علشان أتأكد انى فاهمة كل الجوانب
أول مشكلة: انه واحشك و انك محتاجة لمسته
ثانى مشكلة: انك قرفتى منه و من عاداته و من كلامه
ثالث مشكلة: انك فكرتى فى الطلاق و اللى مانعك كلام الناس
أنا هابتدى من ثالث مشكلة
لو انتى قرفتى منه تماما و الحب راح بتاتا و مش عايزاه زوج ليكى و أب لولادك و مش متخيلة نفسك جنبه و لا معاه … يبقى تتطلقى دلوقتى قبل ما تتطلقى بعد الزفاف و لا بعد الخلفة
لكن
و ركزى معايا فى لكن دى
انا مش حاسة انك فعلا عايزة تتطلقى
منين عايزة تتطلقى و عندك المشكلة الأولى؟ منين مش طايقاه و فى نفس الوقت مشتاقة للمسته؟
و من هنا بقى ندخل على المشكلة الأولى
هو انتى مشتاقة للمسته هو بالذات و لا عايزة أى حد و خلاص؟
لو عايزة تتلمسى و خلاص … يبقى اتطلقى .. الموضوع خلص
لو عايزاه هو بالذات يبقى انتى لسة بتحبيه
يبقى انتى زعلانة منه و من طريقة تعبيره عن حبه ليكى
و دى مشكلة ممكن تتحل بالكلام و الحوار و التفاهم
و كدة بقى نبقى دخلنا فى المشكلة التانية
انا مش هاعترض على قرفك منه و فى نفس الوقت مش هاعترض على اللى هو بيعمله و بيطلبه … الاتنين مش من حقى أصلا
لكن انا هاطلب منك انك تعبرى عن مشاعرك
انتى من الاخر حسيتى انك وعاء لشهوته و بس … بطريقة او اخرى جردك من آدميتك و من انسانيتك و بقيتى أداه
يعنى فى ظروف غير الظروف و بطريقة غير الطريقة انتى كنتى هتلبسى و تقلعى و تعملى كل دا بمزاجك
لكن انتى حاسة انه بيبتزك
لو بعتى له الكلام اللى انتى بعتيهولى دا … هيتجرح و يزعل
لكن انتى ممكن تعبرى عن نفس الكلام دا بطريقة مختلفة توصل له كل اللى انتى عايزة تقوليه
ابتدى كلامك (رسالتك) بانك بتحبيه و بانك مستنية اليوم اللى تتجوزوا فيه و تبقوا فى بيت واحد بفارغ الصبر
اشرحى له مدى افتقادك ليه
اتكلمى عن اللحظات الجميلة اللى كان نفسك تكونوا فيها مع بعض
عبرى عن احتياجك له … احتياجك العاطفى مش بس الجسدى
احتياجك للحوار و الحكى
احتياجك انك تسمعى تفاصيل يومه و انك تشاركيه همومه
و بعدين قوليله انك زعلانة منه
زعلانة علشان حاسة ان كل كلامكم مركز فى الجنس و انك حاسة انه مش بيحبك لشخصك و انك نفسك تعمليله كل حاجة هو عايزها بس فى الوقت الصح و الطريقة الصح لما تكونى انتى من جواكى حاسة ان اللى بتعمليه صح
قوليله انك عارفة انه جوزك لكن فى حاجة غلط
قوليله انك محتاجة وقت و انك محتاجة انك تحسى انك مراته بجد … مراته اللى بيشاركها كل حاجة فى حياته … مش بس شهوته
و اختمى انك لسة بتحبيه و ان كلامكم بتاع زمان وحشك
بصوا هنا كمان - You might like those too
