اتقدمت لها وأهلها وافقوا و اتخطبنا من شهر تقريبا .. كنت حازم معاها جدا في موضوع الإختلاط بالزملاء في العمل لأني كنت بغير عليها جدا .. كنت بطلب منها ماتتكلمش مع حد غريب إلا للضرورة , وكنت بقولها إني بحب البنت اللي بتلبس لبس واسع وماتحطش مكياج .. رجل شرقي نمطي جدا زي ما حضرتك خدتي بالك
بعد فترة من الخطوبة اتعرفت على بنت من الشات .. مش عارف إيميلها كان موجود عندي إزاي , يمكن كنت ضيفتها أو هي ضافتني من زمان .. المهم اتعرفت عليها واتكلمت معاها وبصراحة كنت مستريح معاها جدا , ويمكن كمان كنت ساعات بستناها أونلاين , فيها صفات كتير مشتركة بينا .. وفعلا بيني وبين نفسي اتمنيت اني كنت قابلتها قبل ما أخطب , وقلت لها كده .. صارحتني هي كمان انها معجبة بيا وشايفة إننا مناسبين لبعض جدا .. قلت لها بس أنا خاطب , فقعدت تكلمني اننا مخلوقين لبعض ولازم نرتبط و إن خطيبتي دي مش بتاعتي وطلبت مني اسيب خطيبتي و ارتبط بيها هي .. طبعا انا مش ممكن أعمل كده وحاولت أسحب من الموضوع ده بالتدريج ومن غير ما أسبب ألم للبنت اللي كلمتني على الشات .. وقلت لخطيبتي إن في بنت بكلمها على الشات بس ماقولتش كل التفاصيل
وبعدين البنت بتاعة الشات عملت موقف قلب الدنيا كلها .. بعتت لخطيبتي كل المحادثات اللي كانت بتم بيني وبينها , وخطيبتي عرفت كل حاجة وكل الكلام اللي كنت بقوله للبنت دي .. طبعا كرهتني واتهمتني بالخيانة وغني كنت عامل عليها حمش و بكلمها عن العلاقات وانا آخر واحد بيلتزم بالكلام اللي بيقوله .. بقيت في نظرها خاين وكداب ومخادع وكل الصفات دي
انفصلنا أنا وخطيبتي من اسبوع بناءا على رغبتها وبعد ما اعتذرت لها ألف مرة ووعدتها انها كانت غلطه ومش هتتكرر , بس للأسف كانت اتقفلت من ناحيتي خالص , مع إنها كانت قبل كده بتحبني حب رهيب انا نفسي كنت مستغرب منه
ده الموضوع .. أولا: إيه رأي حضرتك في اللي حصل .. ثانيا: ياترى البنت بتاعة النت ممكن تكون صادقه فعلا وعملت كده علشان بتحبني , ياترى لو ارتبطت بيها هنكون عايشين سعداء , ولا هتفضل عقدة الذنب جوايا وجواها .. هل هقدر اثق فيها و اطمن انها مش هتعمل مع حد تاني نفس اللي عملته معايا ؟؟ هل هي كمان هتثق فيا اني مش هعمل معاها زي ما عملت مع خطيبني واسيبها علشان واحدة تانية؟؟
مستني رأي حضرتك
