انا بنت عندي 22سنة كنت مخطوبة وخطوبتي اتفسخت وبعدها كملت دراساتي العليابالكليه المهم فيه انسان زميلي محترم وواضح انه ابن ناس كان معايا ف الدراسة دي هوعنده 33 سنه الكلام والتعامل بيناف البداية كان عادي وزمله وبس لاحظت عليه بعدها بفترة بسيطه انه اوقات يتعامل باهتمام واوقات تانيه كانه بيهرب حتي يكلمني كزميله المهم لقيته لقيته بعدكده قالي اناظروفي كذا كذا وبحبك ومكنتش عاوز اصارحك بحبي ده لكني حقيقي مقدرتش وبحترمك ظروفه بقه يامروة انه قالي انه متجوز وعنده ولدين وانه الجوازده كان من وهوف 2 جامعه وسبب جوازه هوالمشاكل اللي كانت بينه وبين والده بسبب جوازوالده بزوجه تانية وانه وقتها اعتمدعلي نفسه وصرف علي دراسته واتجوز جواز تقليدي وقعد بالقاهرة المهم بيقولي من سنتين كان حصل مشاكل وكان حيطلق ومراته كانت عنداهلها وخلاص اتفقواع الطلاق لكن ابنه كان بيكلمه ويعيطله ومحتاجله وكمان مراته بعدماكنت بتطلب الطلاق اهلها طلبوامنه يرجعها وكلامه انه هي رجعت كام للاولاد بس وانه ده اتفاقه مع اخواتها وقالي انه مفيش العلاقه الحميميه بينه وبينها خالص المهم يامروة انا بعدماصارحني بمشاعره انا قولتله انامقدرة مشاعرك وبحترمها وانابكنلك كل احترام وتقدير وانت كشخص تهمني وبقيت اقوله خلينااخوات وحاول تخرجني منك وانه الولاد اغلي اكيدعندك من كل حاجه ويستاهلوا انك تكون ليهم وبس ومراتك اكيد كانسانه زي مافيهاعيوب فيها مميزات بس انت اخلع النظاره السوده وبعدين انا مش عاوزة ادمرلك حياتك خصوصا انه اول ماعرفنابعض كان يقولي انتي زي اختي لكنه مع كل اللي انابعمله عشان اصده وابعده واني احاول اخليه يرجع لمراته بلاقيه مصرعلي مشاعره من ناحيتي وياكدلي انه مفيش جواز هيه مجردام اولادي مش زوجه وانا اساسا مش ليها وعاوزك تكوني جمبي وشريكة حياتي واناحعمل المستحيل عشان تكوني ليه وححاول اقنع اهلك بس انت وافقي…..انا..فيه مشاعرخاصة من ناحيتي لكني بجد بحاول اخبيها لكنه دايمايقولي عنيكي بتقول غيركده ………. وهوجادوعاوز يتقدم وبيوعدني وياكدلي انه ليه اناوبس ومش حكون غيرليكي وتاكدي اني كنت كده كده حتجوز لاني مفيش علاقة بيني وبين زوجتي قوليلي رايك يامروة ضروري
__________________________
بصى يا مشمشة
انت عارفة موقفى من موضوع الزوجة التانية و على عكس بنات و ستات كتير انا مش هقف فى طريقك
و لكن لازم تبقى عارفة انتى طريقك هيبقى شكله ايه
أولا انت 22 سنة … يعنى الاختيارات قدامك ما لهاش أول من آخر … سؤالى ليكى .. ايه اللى يجبرك؟ لا سن و لا ظروف و لا شكل و لا اى حاجة
ثانيا انت مش عايزة تخلفى؟ لان هو كراجل و مهما قالك ما تصدقيش .. هو خلاص خلف و مش ناقص مصاريف و قرف عيال و سهر و الحق و خلى بالك .. من الاخر ابوته مش ناقحة عليه و اغلب الجوازات التانية دى عدم الخلفة بيكون جزء منها حتى لو ما اتقالش صراحة
ثالثا يعنى ايه ام لولاده و ما فيش بينهم علاقة؟ الكلام دا يرضى ربنا؟ انت تحبى تبقى مكانها؟ انا كنت هاحترمه اكتر لو قال انها مراته و علاقتهم كاملة بس هو عايز يتجوزك انتى كمان …. طفاسة يعنى … لكن انه سايبها كدة زى البيت الوقف؟ زى الخدامة ام بلاش كدة؟ زى دادا لقطة؟ دا كلام يدل على حاجات كتير فى شخصيته
رابعا ما تتجوزيش من غير علم و قبول مراته .. هو مش بيقول لك العلاقة اخوات .. تسمعى منها
خامسا انت لو منتظرة حياة زوجية و اسرية مستقرة زى صاحباتك يبقى انتى بتخدعى نفسك .. الراجل دا اولاوياته ولاده و بعدين اهله و بعدين شغله و بعدين ام ولاده .. ايوة ما هى مسئولة منه … و بعدين ممكن انتى تيجى لو هو ما عندهوش اصحاب و لا اهتمامات تانية
سادسا … المناسبات … عيد ميلاده؟ اول يوم رمضان؟ اول يوم العيد؟ راس السنة؟ عيد الحب؟ المصيف؟ الفسح و الخروجات؟ انت و لا ولاده و لا انت و ولاده؟
انت سنك صغير و هو اكبر منك سن و خبرة و احتمال يكون قدر يأثر عليكى … لكن فكرى كدة فى شكل حياتك معاه و وجود اولاده فيها و قررى
