fbpx
مونتيسوري مصر- تقدمها مروة رخا

مثال حى على عدم التصالح مع الذات – مشكلة حلوة

استاذة مروة
دلوقتى انا اتخطبت للشخص اللى بحبه سنتين مضحية بعمرى جمبه
بس خلال السنتين دول بعدنا حوالى خمس شهور ورجعنا تانى بس الفترة دى دخل شخص تانى لحياتى
والشخص ده مالقيتش منه غير كل اهتمام وكأنى بنته
وكنت فعلا كل حاجة ف حياته
لأنه اول مرة يحب ف عمره وكان عارف معاناتى مع الاولانى
ربنا ما ارادش اننا نكمل
وبعدنا عن بعض
وشاء ربنا يرجعلى حبيبى الاولانى تانى لأنى فعلا كنت متعذبة بسبب غيابه
لأن بعد حبى ليه ووقوفى جنبه
اتخلى عنى لما اتقدملى عريس وقالى انى واحدة عايزة اتجوز وخلاص وانى بعرض نفسى للى يدفع اكتر مع انى والله العظيم لو بفكر كدة كنت زمانى متجوزة ومخلفة كمان المهم ربنا شاء اننا نرجع ويتقدملى وعملنا فاتحة السنة اللى فاتت وربنا رزقه بعقد عمل وهيسافر وامى صممت يعمل شبكة قبل ما يسافر
وده سبب فجوة كبيرة اوى بينه وبين ماما لأنه قال انها مش واقفة جنبه ومش هتقدره وانى هكون زيها
ودلوقتى الخطوبة اتعملت
وبجد قبل الخطوبة ما تتعمل انا كنت مترددة لانه فى طباع كتير مش حلوة اهمها الشك مع انى مش بعمل حاجة وده خلانى من جوايا متعلقة بالشخص اللى عرفته ف فترة البعد انا معترفة انى غلطت
وغلطت اكتر لما وافقت بحبة حاجات كدة بيننا كل ما نقول هنبطلها مش بنبطلها
غصب عنى وانا معاه بيحصل حاجة كدة
من كل اللى فات ده انا عندى مشاكل من جوايا انى ف حاجات مش قادرة اتأقلم عليها من طباعه بحاول بس هو مش مساعدنى
تقريبا كل ما اقول حاجة يقولى انا الراجل وانتى الست
تانى حاجة
ظروفى الاجتماعية حتمت على والدتى انها تشتغل مدبرة منزل عند واحدة ست ربنا يكرمها وقفت كتير جنب ماما
وانا دلوقتى هتخرج من كلية تربية قسم انجليزى وبشتغل دلوقتى على ادى ف كام درس خصوصى
يعنى ربنا يسهل واكبر ان شاء الله
خطيبى عارف ده لأن واحدة قريبتى كانت شغالة معاه والى حد ما هى اللى قالتله ولما سألنى ما قدرتش انكر واستقليت بنفسى اوى
يعنى حسيت انى قليلة مع انى شهادتى الدراسية اعلى منه هو معاه معهد وانا هبقى مدرسة
خطيبى عنده قريب باباه غنى جدا جدا
وعنده ابن وحيد
يوم شبكتى بنت الست اللى ماما شغالة عندها حضرت الشبكة وقريب خطيبى عجبته جدا وكان عايز يتقدملها بس هى رفضت عشان ما تبقاش نسيبتى
ودلوقتى موقفى قدام اهل خطيبى وحش جدا ومش عارفة ابرر سبب الرفض ايه
لأن وارد جدا انهم يتقابلو ف النادى اللى هم مشتركين فيه وساعتها عيلتو كلهم ممكن يعرفو ساعتها مش عارفة موقفى انا هيبقى ايه
والله مش مستعرة من امى
لأن هى اللى وصلتنى للى انا فيه
بس مش عارفة
لو اهله عرفو مش هقدر اكون وسط ناس مستقلين بيا يعنى حسين انى قليلة
مش عارفة اعمل ايه
وخطيبى امبارح سألنى ايه الاخبار قلتله والله العظيم هى مستكبرة انى اكون نسيبتها
وما صدقنيش فكرنى انى عايزةة افركش الموضوع عشان ماما قلتله والله ابدا
وبجد مش عارفة اعمل ايه
انا والله مش هتخلى عن امى مهما كان السبب كل واحد حياته بتعرض لصدمات ومش ذنبنا ان امى نزلت تشتغل
استاذة مروة
جوايا خوف كبير اوى
وخصوصا ان خطيبى هيسافر وجوايا احساس انه اول ما هيكبر اول حد هيدوس عليه هى انا
بحاول بقدر الامكان ما اخليهوش يحس انه قليل
او انى حرمته من حاجة اللى حواليه يشوفوها يعنى زى الهدايا
وانا ربنا ادانى نعمة الجمال ف الشكل والروح
الحمد لله
وكمان لبسى شيك
مش وحش على ادى
بس انا فعلا مش عارفة اتصرف لو اهله عرفو موقفى ايه ساعتها
اسفة انى طولت على حضرتك بس انا جوايا صراع نفسى مش عارفة اوصفه لحضرتك ازاى
—————————————–
حبيبتى انت قراراتك كلها عبارة عن سلسلة اخطاء مبنية على بعضها و ان دلت على شئ فى تدل على عدم ثقتك فى نفسك و عدم تصالحك مع ذاتك
اولا
اسباب ارتباطك بالولد كلها غلط
انت شايفة انك ضيعتى سنتين معاه و مستخسرة تبتدى من اول و جديد
انت شايفة ان مؤهلك اعلى منه و دا مديلك احساس مزيف بالثقة و التميز و التفوق عليه
انت اتعودتى عليه جسديا او جنسيا
ثانيا
فى علامات كتيرة بتقول ان الجوازة دى زفت
فى معايرة بالفلوس و الامكانيات حصلت كذا مرة
خوفك من اهله و رد فعلهم لو عرفوا وظيفة مامتك
شكه و غيرته الغير مبررة
مقرانتك بينه و بين الشخص التانى
عدم وجود لغة حوار و جملة انا الراجل و انتى الست
احساسك انه اول ما هيكبر هيدوس عليكى
ثالثا
فى مشاكل بقى فيكى انت شخصيا
احساسك الشخصى بالنقص بينعكس على تقيمك لكل المواقف
احساسك بالخجل من ظروفك
تطلعاتك الاجتماعية
اعتمادك على شكلك و لبسك لاعطاء صورة مضللة عن مستواكى الاجتماعى
بعد كل النقط دى تفتكرى تعملى ايه؟
من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”