السن: 19 سنة
التهمة: بايرة
________________________
السلام عليكم
ازيك يامروة؟
انا طالبه فى تانية جامعه عندي 19 سنه .. يعنى شويه لسه صغيرة
بس كل الناس اللى حوليا محسسنى انى كبرت لان كل البنات قريبى من سنى او اكبر اتجوزوا وخلفوا لانهم مش مكملين تعلمهم دبلوم وبس
بس بقيت احس من نظرات كل الناس فى عيلتى انى بايرة وفى ناس بتفضل تسأل ماما كل شويه وكلام كتيييير عن الموضوع ده
انا بجد اتخنقت اووي من كده .خاصة انى حسيت ان ماما كمان بدأت تقلق هى وبابا من كتر كلام الناس بقم عايزينى ارتبط
المشكلة كمان انى عمري معشت قصة حب او ارتبط بحد من زميلى او حد جه قالى انه معجب بيا ولا حاجه
فهمانى يعنى انا بقيت فاقده الامل فى موضوع الارتباط ده خاالص لان كل الولاد اللى اعرفهم زميلى فى الكليه ومفيش اي مشاعر بينى وبين حد فيهم زماله بس
لو هتسألى انا عايزة ايه؟؟
انا نفسي احب واتحب واعيش الشعور ده بس باحترام يعنى زذي اي بنت نفسها تتحب وتتخطب
وبرده عايزة اعمل مستقبلى وابقى حاجه كبيييرة فى المجتمع
عايزة ده وده . لكن مفيش اي حالة حب فى حياتى ابداااا عمري معشتها رغم ان معظم الناس معجبين باخلاقى وبشخصيتى
فاقوليلى اعمل ايه علشان اثبت قدام كلام الناس ده وما اتثرش بيه
_________________________
اهلا يا مشمشة
انا لا هزعق و لا هاتنرفز و لا هتعصب و لا هجيب سيرة الغباء و التخلف و الجهل و المجتمع اللى عايز يتفور زى الحمام القديم
انا هقول لك شوية حاجات تفكرى فيهم و ان شاء الله هتفلتى من مصير قريباتك
اولا تعليمك و شهادك و كمان وظيفتك دول اسلحتك … انا مش هفترض انك اتجوزتى واحد قليل الاصل و لا واحد بخيل و لا واحد بيبيع و يشترى فيكى .. لكن ماحدش ضامن الظروف و اللى مستخبى .. يبقى الاول تقفى على رجليكى و تخلصى علشان لو الفاس وقعت فى الراس تلاقى حيطة تسندى عليها بدل ما تعيشى طول عمرك زى العربيات … من ملكية فلان لملكيه علان
ثانيا الدنيا مراحل … يعنى اللى اتجوزت و خلفت فى وقت الجامعة هتعمل ايه كمان 5 سنين؟ و لا عشر سنين؟ و لا 15 سنة؟ هى لا استمتعت بحياة الجامعة و لا بحياة ما بعد الجامعة و لا الاستقلال النسبى و لا الوظيفة و لا شافت ناس و لا احتكت بحد …. يعنى بنى آدم غير مكتمل النمو. لكن انتى هتعيشى و تستمتعى بكل مرحلة و هتبقى زوجة انضج و ام افضل
ثالثا الحب هييجى بوقته .. لا تدورى عليه و لا تستعجليه
