مروه, انا بعتلك من مده طلبت منك إميليك علشان أحكى لك عن مشكله بس مبعتش لانى كنت حاسه انه مفيش امل
مروه انا عندى 20 سنه, أتولدت و أتربيت فى اسره متدينه بس مش مغلقه
على نفسها و عمرى ما حبيبت قبل ما أقابله
عرفته عن طريق واجده صحبتى و كنا بنشتغل مع بعض, بدأنا نتكلم و طلب يشوفنى بره الشغل و أستأذنت أهلى و روحت شوفته و بعد وقت قصير قوى صرحلى بحبه ليه و انا كمان متردتش انى اقوله بكل صراحه انى بحبه
الكلام ده كان من أربع شهور و اول أسبوعين او ثلاث أسابيع مروا حلو قوى و بعدين بدأت المشاكل اللى ظهرت بسبب أختلاف وجهات نظرنا من ناحيه الدين
هو مش شاب وحش و لا بيصاحب بنات و لا اى حاجه بش مشكلته انه راضى بنفسه و بعلاقته مع ربنا اللى انا كنت شايفه انه لازم يصلحها و كنت و الله يا مروه بتناقش معاه فى حاجات كثيره غلط بيعملها و مكونتش بخنق عليه لا تفتكرى انى من الناس المتعصبه اللى مش بتتكلم غير على النار بس انا كان نفسى يبقى كويس و يبطل يسمع اغانى و يقرب لربنا
اول صدام حصل ما بينى و بينه لما قالى انه حيرجع للسجاير اللى بطلها اول ما اتقدملى و اللى وعدنى انه مش حيرجع لها
و بعد كده توالت الحاجات عليه و بدأت أحس أنه مش هو ده الانسان المناسب
مش علشان هو وحش لكن علشان دنيتنا مختلفه, و المصيبه الكيبره كانت صحابه, و بنت من صحابه يا مروه كان بينزل معاها و يخرج و انا مكنتش ممانعه لحد ما عرفت انه كذب عليه و قالى انه نازل لوحده و هو كان معاها و اعتذر على الكذبه مع انى عمرى ما قلتله ما تنزلش
و من هنا بدات اركز مع البنت ديه, هى أكبر منه ب 13 سنه لكن مريبه و تصرفتها غريبه قوى
كانت تدخل تعلق على صوره بكلام غريب و مبهم متفهميش ديه بتعاكسه و لا معجبه بيه و هى مش حاسه و لا هى بنت مش كويسه و لا أيه
كانت تبقى نازله تتغدى معاه و الاقيها كاتبه على الفيس بوك “النهارده كان يوم تحفه
فأنا بدأت أضايق و اللى زود الموضوع انه كان بيحكلها كل حاجه عننا خصوصا أختلافتنا والخناقات
أعدت و أتكلمت معاه و فهمته انه مينفعش ييحكى لبنت غيرى لان انا مفروض اقرب واحده ليه و مينفعش كل ما يبقى مضايق منى او من حاجه تانيه يجرى عليها, المفروض يجرى عليه انا مش هى و فهمته ان الاسلوب ده يخلى مشاعره مشتته ما بينا احنا الأثنين
و بعدين يوم ما كذب عليه و قالى انه لوحده وكان معاها و أعتذر طلبت منه يقلل الخروجات معاها بس و لا الهوا و لا كأنى قلت حاجه
المهم أتكلمت تانى معاه و قلتله لو طلبت منك تبطل تنزل مع البنت ديه لوحدك حتقول ايه؟
قالى حقول لا, قلتله طاب مش تسأل انا طلبت كده ليه؟
قالى ليه؟ قلتله بص هو مش منطقى انك تبقى خاطب و تبقى ليك صديقه قريبه كده و تنزل و تورح معاها و انا كنت ساكته و قابله بس الوضع ده بقى بيضايقنى و لو سمحت وقف الموضوع ده
قالى لا ,إنتى واخده الموضوع شخصى علشان كذبت عليكى انتى مضايقه منها
قلتله صح بس مش بس علشان كده, ديه واحده عندها 34 سنه و انت عندك 22 سنه و هى مش مرتبطه و حتومت و ترتبط و عندها فراغ عاطفى طيبعى تتجذب ليك و انت تتعلق بيها لانها فى وشك علطول و ساعتها قلتله على
موضوع التعليقات و الصور و الكلام اللى انا مش مرتاحه له
قالى لا حنزل معاها و سكت كثير و قالى هو ايه فينا زى بعض, يعنى بنحب بعض ليه؟ قلتله انت متأكد أنك بتحبنى قالى لاء
كان قبل كد قالى لو ماكونتش بحبك كنت سيبتك علشان انتى متدينه و قبلها بيوم سألنى انتى متاكده اننا بنحب بعض؟
بعد ما قال كده انا انهرت فى العياط و طلبت منه يروحنى, و فى نص السكه نرلت و سيبه و كملت ماشيه بعيط مش شايفه حاجه قدامى و هو ورايه لحد ما وصلت البيت
أختى كلمته فقال لها انا مش حينفع يكمل معايا
مروه الموضوع خلص من شهرين و انا كنت بتمنى ان ربنا يعمل حاجه و ينهى الموضوع لانى كنت عارفه انى مش حكون سعيده معاه بسبب موضوع التدين ده و
انه مش حيتغير
انا اول ما سبته كنت اقوى من كده و لكن بضعف كل ما الوقت يمر, محدش فاهمنى من اللى حواليه, كلهم متصورين انى حجر و ما كونتش بحبه علشان لما بسألونى بقول انا محبتوش بس انا بهرب من احساسى بالفشل و جيبت الامل فى الانسان الوحيد اللى حبيته و بقول مش بحبه بس انا بحبه يا مروه و ان كنت عارفه الاختلاف الفظيع اللى ما بينا و ان علاقتنا كان محكوم عليها بالفشل لا محاله مهما كان طال الوقت و لو كانت كملت كان حيبقى على حسابى انا و بتضحياتى انا لانه مش عايز يضحى
اول ما سبنا بعض اتقدملى واحد و قلت لصحبتى اللى تعرفه و من يومين كان واحشنى ففتحت البورفايل بتاعه و لاقيه كاتب انه مرتبط و انا من ساعتها و انا منهاره و مخنوقه و الف سؤال فى دماغى
هو عمره ما حبنى؟
هو بيعمل كده علشان ينسانى؟
يمكن بيكذب علشان يضايقنى علشان يمكن صاحبتى قالتله على موضوع الولد اللى أتقدملى؟
و خلاص قربت أتجنن
بتظاهر بالقوه بس انا جوايه بركان, زعلانه على نفسى و منه و عارفه ان الموضوع كان بايظ بايظ و انه اساء معاملتى بس بردوا باكيه عليه
و انا تعبانه يا مروه
اعمل ايه؟
من ساعت ما سبنا بعض مشوفتوش و لا مره لكن حشوفه قريب فى الشغل و خايفه اتعب و انهار لكن فى نفس الوقت انا بكره الهروب و مش عايزه اسيب شغلى و لا حياتى علشانه
قوليلى اعمل ايه؟
ساعدينى أرجوكى
