دلوقتي انا اعرف بنات كتير صحباتي متجوزين ومخلفين، وتقريبا كلهم، ومن خلال تعاملي معاهم، وكلامهم معايا اكتشفت ان في مشكلة تكاد تكون واحدة مع اختلاف شوية تفاصيل بسيطة، المشكلة دي عند اغلب صحباتي البنات..
هي ان كل واحدة فيهم بعد مرور فترة مش كبيرة من الجواز تكاد تكون بعد سنة وشوية او سنتين، تبداء تشتكي من انشغال جوزها لدرجة شبة اهمال لكن مش اهمال كلي، هو اهمال جزئي، يعني مثلا واحدة فيهم قالتلي مرة..
ده بيدخل من باب البيت حتي الابتسامة مش بيبتسمها، ولا حتي كأن في واحدة قاعدة مستنية، وينام من التعب ويرجع يصحا علشان ينزل تاني للشغل، وحتي الجمعة مش بيعرف ياخدة اجازة مع العلم ان هو مهندس مدني ولسة في اول حياتهم وعندهم مسؤاليات كتير واقساط وحاجات كدة، و بيكون نفسة،
وهما كانو بيحبو بعض حوالي 7 سنين قبل الجواز، ومتجوزين دلوقتي بقالهم 3 سنين ومعاهم بنوتين، هي مقدرة مسؤالياتة لكن حاسة ان هو بقا يهملها، معنويا، لكن ماديا هو قايم بكل ادوارة، وبتحبة وهي متاكدة انو بيحبها، بس مفتقداه وكلمتة كتير، برغم انهم متفاهمين جدااااااااااا،
لكن النقطة دي منغصة حياتهم قوي، هو بيقول انا ببني مستقبلي وكلة ليكم وكده لكن هي تعبانة نفسيا… والتانية لسة متجوزة مكملتش سنة، ولاقيتها بتشتكي من نفس المشكلة بالظبط، مع اختلاف ان اهتمامة بقا الشغل، واهلة علشان هو والدة متوفي، بس هي بقت اهتمام من ضمن اهتماماتة يعني مش كل اهتماماتة زي ما هي بتهتم بية كل الاهتامم وهو اهم ما في حياتها…
انا نصحت واحدة فيهم تسمع حلقة الاهتمامات المشتركة لأني حسيت ان المشكلة ان كل واحد فيهم اهتمامة غير التاني لذلك مش قادرين يجدو قاعدة مشتركة بينهم مخلية كل واحد مضايق من اهتمامات التاني، اصلي حسيت ان اكيد جوزها هو كمان مضايق من مثلا ان هي ليها اهتمامات تانية مش عارفة بس قولتلهم يسمعو الحلقة.. انتي شايفة اية السبب..؟؟؟
وهما يعملو اية بقا دلوقتي، وتنصحيهم بأية لأنهم تعبانين قوي من النقطة دي، برغم انها تبان بسيطة.؟ في سؤال بقا اخير وده يخصني انا دلوقتي انالسة متجوزتش بس عايزةاعرف لما اتجوز اتفادي النقطة دي ازاي، واعرف اهم الاسس اللي تخليني مقعش في الفخ ده..؟؟
