انا مش عارفه ابدأ منين ,,انا مش من الناس اللي بتطلب من حد انه يطبطب عليها عشان ده بيجرحني اكتر …أنا انجرحت كتير وقمت أسد وبقع واقوم ولا ابص ورايا وبفتكر اني قمت وبس مش اني وقعت وكنت قافله موضوع الحب ده شويه من كتر اللي حصلي منه هو دايماً القصه بتدوم لحد ماتوصل البيت وبعدين تقف بقدرة قادر .. بصي بئا انا عندي 25 سنه وعرفت واحد من سنتين من مجال شغلي وفضلنا اصحاب لسنتين وتلميحات منه مستمره وشويه معايا وشويه مش معبرني هو حد معروف فى وسطى وكلام كده المهم فجأه مره واحد زود عدد خروجاتنا وصارحني انه فعلاً كان بيحبني " ماكنتش تهيؤات أهو " وان خلينا شويه سوا نشوف الدنيا فيها ايه ..هو عنده 36 واتجوز قبل كده وطلق بسرعة لاسباب غريبه شويه وخطب كام مرة وسابهم برضه لأسباب اغرب واغلب الاسباب انه حد متونس بوحدته وماسكه فيه ومش عاوز حد ياخد وحدته منه المهم الموضوع كبر وقعدنا 6 شهور قريبين اوي اوي اوي وبعدين قرر يجي البيت …. أمه بئا وانا قاصده اقولك امه.. كويس اني ماقلتش ام اربعه واربعين كلمتني قبل ماتيجي بيتنا وقعدت تحكيلي عن كل عيوب ابنها وهتستحملي وتستحملي وهتقدري وهتقدري فأنا عملت عملت نفسي عبيطه ومش فاهمه انها بتخوفني وطمنتها ( على فكره كانت معترضه على فرق السن واني بشتغل ومش محجبه رغم ان ابنها عارف ده كله ومعندوش مانع وكنت هاسيب شغلي وهاعمله كل اللي عاوزه ) ما علينا وخلصنا وكلمت ماما وحددت ميعاد وجات لنا وهي بتأكد على انه تعارف ما علينا كنا هايلين معاها انا وماما لدرجة انها ماجبتش حاجه معاها وهي داخله بيتنا .. وبعدين مشيت وهو كلمني قالي ماما مبسوطه اوي وبعدين اتغير شويه وقالي عاوز ابئا لوحدي فسبته وانا ماسكه نفسي فقعدنا مافيش تواصل وبعدين كلمني قالي انا لسه عاوزك هو انا لما اقولك سيبيني تسيبيني كده على طول وقالي عاوز اقرا فاتحه بكره لان اهلي مسافرين فقولتله خلاص لما يرجعوا وبشويش بلاش تسرع وعدى شهر وبعدين باباه طلب انه يقابل بابا وحصل وبابا كان حلو اوي برضه معاهم … اسمعي بئا اسباب الرفض ( ايه ده هو باباها ماكنش يعرف انها بتخرج معاك .. مش فاهمه يعني كنت وانا نازله اقول لبابا انا خارجه مع البوي فريند بتاعي يلا سي يو ومامتها طلعت تاني بموضوع السن وقال ايه عملت استخاره ومارتحتش) فقالي هي دي الاسباب وانه مش عاوز مشاكل معاهم والجوازه اللي الأهل بيكونوا معارضين فيها بتتملي مشاكل .. بصي انا هتجنن انه ماوقفش اودام الاسباب التافهه دي ووهو بيسيبني قال ايه بيقولي ان احنا نصيبنا نحب بعض لكن مش نصيبنا نتجوز وان قرار الجواز والاستقرار لسه شويه عليه وانه خايف يأذيني زي اللي قبلي ..اي كلام ..المهم سابني في موقف لا احسد عليه اودام اهلي .. عاوزه ارجع اتصلح مع نفسي مش قادره حاسه اني اذيت نفسي اوي بصبري عليه وطول الوقت يقولي طمنيني على اودام واننا مش هنخسر لو اتجوزنا طول الوقت بطمنه طيب انا مين كان بيطمني وكان عاوز يخطب في اسبوعين ونكتب كتاب ونسافر كان بيكروت نفسه يا مروة بيخدر دماغه عشان اول ما يتجوز يقول الله انا مين اللي جابني هنا … مشكلتي ان انا مش جايه عليه وحاساه ضحيه للوحده والعالم اللي هو عايش فيه وده مش حقيقي انا نفسي اكرهه .. انا مابكلموش خلاص والموضوع انتهى انا بس بعد الموضوع ماكنتش قادره امسك نفسي بس دلوقتي رضيت خلاص ومابكلموش بس خايفه نتقابل واحن ليه وخاصة ان اخباره حواليه بمذاجي او بغير مذاجي ..
انا عارفه اني طولت اوي انا آسفه بجد بس لاقيتني بحكي بفضفضه مش اكتر ..انا مستنيه ردك عليا
______________________________________________
أهلا اهلا
انت تحمدى ربنا و تبوسى ايدك وش و ظهر انه بان على اصله
دا لا كان هيعمر فى جواز و لا هيشيل مسؤولية بيت و لا عيال و لا غيره
هو فعلا اتعود انه يكون لوحده .. و لوحده هنا مش معناها مستقل .. لوحده هنا معناها براوى و انانى و عديم المسؤوليه
كل ما ييجى على بالك افتكى شكل العيشة اللى كنتم هتعيشوها و المقلب اللى كنت هتخديه و احمدى ربنا
