هاى مروة .. إيه أخبارك ؟؟ .. أتمنى أنك تكوني بخير .. بصراحة أنا بجد بحترم آرائك و شخصيتك و بتابعك على روتانا .. لأن أول ما شوفتك هناك حبيت أتعرف أكتر و حسيت أنك ممكن تساعديني .. أنا مش عارفه هقدر اكلمك إزاى هنا على مشكلتي لأني بصراحة مجربتش إنى أستشير حد قبل كده ماعدا طبعاً أصحابي البنات …
أنا بنت عندى 16 سنة و اتعرفت على واحد كان صاحب حبيب صاحبتي و هى اللى عرفتنى عليه .. هو فى جامعة و عنده 20 سنة و بيشتغل حالياً .. و كان لسه خارج من علاقة خطوبة .. المهم أحنا اتقابلنا فبصراحة حسيت إنى أتعودت عليه بسرعة و حبينا بعض على طول بعد كام يوم كده .. المهم فضلنا مع بعض بس كان دايماً بتحصل مشكلات بيننا أصل ساعات صحبتى تيجى تقولى انه قال عليا حاجات مش كويسه و طبعا هى عرفت كده من حبيبها اللى هو صاحبه الروح بالروح .. وكان على طول يتحصل مشكلات من النوع ده و نتخانق على طول و كل لما اجى أقوله انت قلت كذا يقولى أنا مقولتش و لو كنت عايز أقول كنت هاقولك فى وشك مش من وراكى.. و فى نفس الوقت كان بيوصله كلام إن أنا قلت عليه كلام مش كويس و أنا عمرى ما قلت كلام مش كويس على حد فمبالك هاقول على حبيبي يعنى .. بس و كان على طول و معظم وقتنا بتحصل المشاكل دى و أهو كنا بنعديها فحصل موقف إن بابا عرف أنى كنت عارفاه فطبعا رفض علشان احنا عيلتنامتدينة شوية فطبعا ممنوع الكلام ده .. بس و انفصلنا بعد ماكنا مع بعض شهرين .. بس أنا بعد لما باب عرف قلت كمان أكون جمبه و مهما حل بس هو كان مبيردش على اتصالاتي و كان بيقفل الموبايل فقلتخلاص هو تخلى عنى وانا مش هجري وراه فانفصلنا بعديها و بعد علاقة دامت شهرين ..فأنا بقا عايزاكى تقوليلى رأيك فى حكاية المشاكل اللى كانت على طول بتحصل بينا بس اهو كنا بنعديها و نفتح صفحات جديدة ..
بس بعد ما انفصلنا طبعا طول الوقت كانت بتوصلى أخباره أول بأول لأن صحبتى كانت بتقولى عليها .. بس أنا كنت خلاص يعنى قربت انساه ..بس بعد شهر صاحبتى كانت مسافرة فقلنا نخرج قبل ماتسافر .. فخرجت معاها هى و حبيبها و مكونتش عارفه احنا رايحين فين هى بس قلتلى انها عملالى مفاجأة و قلت ماشى لكن مخطرش على بالى أنها تأخدنى عشان أقابله و بصراحة لما قابلته ادايقت .. إزاى وقت مايكونش عايزنى يبعد و وقت مايكون محتاجنى أروحله .. بس هى أقنعتنى انه بجد ندم واتغير و كل حاجة وبصراحة أنا حسيت أول ماشوفته إنه كان وحشنى قوى .. فبعد أسبوعيمن من الكلام عادى رجعنا لبعض .. وكنا عادى فى حب و كل حاجة بس جاتله فترة شغل و الفترة دى اللى أنا فيها دلوقتى..معدش بيتصل بيا خالص و كلم ماتصل بيه يقول مشغول فى الشغل أو يكنسل عليا و فين و فين لما بكلمه و معنتش عارفه أخباره ايه و بيروح فين مع العلم ان طول علاقتنا كان ديما مغرقنى اتصالات و بالساعات مكنش بيهمه بجد أى حاجة غير أنه يتصل بيا و يكلمنى بس دلوقتى انا مش عارفه هو بطل يهتم بيا ولا ايه أصل سمعت حلقتك عن الإهتمام فى الحب و عايزه بقا أخد رأيك .. فمعلش طولت عليكى بقصة حياتي … بس يا ريت بجد يا مروة تجوبينى و هكون ممنونة ليكى ……
_________________________________________________________
اهلا يا مشمشة
طبيعى انك فى السن دا تنجذبى للشباب .. بس انا طلبى الوحيد انك المرة الجاية تختارى صح … الولد دا كان غلط من الأول
اولا حكاية حبينا بعض فى يومين دى معناها انه بيتسلى و انت مش بتستخدمى عقلك خالص
ثانيا لما باباكى عرف كان المفروض يقوللك اكلمه و اشرحله مش يختفى زى الحرامية
ثالثا مافيش دخان من غير نار .. يعنى الكلام اللى كان بيوصلك انه بيقوله عليكى اكيد له أصل .. الا اذا انت مش واثقة فى صاحبتك و ان اخلاقها مش تمام .. و لو الحال كدة يبقى هتعرفك على مين غير شاب زيها اخلاقه مش تمام؟
رابعا: معاملته ليكى مافيهاش احترام و لا تقدير .. يبقى عليكى بايه؟
فكرى كدة و خدى قرارك بنفسك
