انا حاسة انى وحشة و حبيبى عمره ما هياخد باله منى

مروة انا سعيدة انى بكتبلك مروة انا خجولة جدا واعانى من عدم الثقة بالنفس انا بحب ابن خالتى ل5 سنوات هو وسيم وجرى جدا ودايما بخجل اكلمة حتى كلام عادى ودايما بتفرج من بعيد وهو بيكلم بنات وبعيط جامد  ودايما بتوتر لما بيكلمنى  فبقول كلام جارج لية وبعمل افعال غبية حتى انة قال علية معقدة وكئيبة لانى دايما ساكتة وحسة انى وحشة واقل من بنات خالتى علشان كدة بتجنب دلوقتى انى اروح المكان ال هو فية رغم انة بيوحشنى جدا وبتصل بنمر غريبة علشان اسمع صوتة من غير ما يعرف مين ال بتكلمة  ومن سنة اكتشفت انة بيحب واحدة جدا مش عارفة اعمل اية انا بحبة جدا  وساعات بحس انة حتى معجب بيا مرة لما ماما راحت عندهم سال عليا لية يا مروة ولما بروح عندهم بيرزل عليا  ويجلس معانا مع انة دايما بيخرج انا عارفة انى بوهم نفسى بس بجد انا قلبى بيوجعنى اوى ونفسى اقولة انى بحبة

___________________________________________________

أولا فى فرق بين الخجل و عدم الثقة بالنفس … الخجل صفة محببة لقلب أغلب الرجال الشرقيين .. لكن عدم الثقة بالنفس ثقة منفرة … البنت من غير ثقة بنفسها بتبقى عاملة زى اللمبة المحروقة … لا ليها ضوء و لا بريق و لا لازمة

ثانيا لو انت ماقدرتيش تحبى نفسك … اللى هى اقرب حد ليكى يبقى ليه تتوقعى ان اى انسان يحبك؟ مادمت حاسة بالنقص هتتصرفى تصرفات فيها نقص و عدم اتزان و دا بدل ما يجذب ليكى راجل محترم و يحبك هيجذب ليكى راجل عايز يتسلى على ألمك

ثالثا ابن خالتك وصلت بيه الجرأة انه يقوللك انك معقدة و كئيبة … يبقى هيحبك ازاى و يتجوزك ليه؟ مين عايز يقضى بقية عمره مع واحدة كئيبة؟

يبقى قبل ما تصارحيه بمشاعرك و تعرضى نفسك للرفض … ايه رأيك تتصالحى مع نفسك و تحبيها علشان يرجعلك بريقك .. ممكن وقتها هو ياخد باله من التغيير الايجابى اللى فى شخصيتك و هو اللى يصرح لك بحبه