ماما بتخون بابا و انا مش عارفة اعمل ايه

انا حكيلك على اكبر مشكلة في حياتي اللي عمري ما حكتها لحد ولا حد اقرب الناس لية ولا حد صحابي اوي

انا اول حاجة مصرية بس عايشة في بلد عربى ماما اول حاجة لمى كنا عايشين في مصر جة اعلان في الجرايد ان عايزين مدرسين يشتغلو في البلد دا ماما راحت وقدمت وقبلوها

بس الكفيلة شرطت عليها انها اول سنة تروح من غيرنا راح بابا قلها ماشي روحي لو انتي عايزة ماما قالت خلاص وابقى اجلكو في الاجازات

في واحد بقى هو دة المشكلة دة مدرس شغال عند جوز الكفيلة في مدرسة الاولاد

ماما بقى كانت عايشة في شقة هيا وثلاث مدرسات و مين بقى اللي كان بيخدمهم؟ هو الراجل دة. الراجل دة عندو اكتر من ستين سنة دلوقتي بس تشوفية ولا كانة عندو 20 سنة عايش ايام شبابة وشيك وجسمة حلو و عندو ولدين في مصر ومراتة تقدري تقولي مطلقين يعني ما بيكلموش بعض ولا حاجة عادي بس هما مرضوش يطلقو رسمي علشان الناس وعيالو لمى يتجوزو وكدة

ماعلينا

ماما كانت كل اجازة بتنزلنا وصاحبتها برضو بينزلو مصر بس مين بقى اللي كان بيروح معاهم علشان يشترلهم الهدايات غير الراجل دة ومن هنا ابتدتت العلاقة
وعدت السنة وجينا احنا البلد دا بس بابا ماجاش معنا و قعد سنة كان بيجي زيارات

دلوقتى هو جة واشتغل مدرس

لكن في خلال الايام الي بابا ماكنش موجود فيها مين بقى اللي عمل معانا الشقة اكيد هو الراجل كان كل يوم يجي ويخرجنا ويرجع يقعد يسهر معانا في البيت لغاية الساعة اتناشر وحدة وبقيت انا الاحظ ان في حاجة بين ماما وراجل دة بس قلت يمكن شك بس اتاكد لمى كنت ادخل عليها الاودة والاقيها عملا نفسها بتعلق الهدوم ورا الباب وتكلمة او تكون في الحمام او تعمل نفسها بتغير ولمى كنا نخرج معاة كانو يودونا مكان في العاب علشان يقعدة لوحدهم كانو بيقولولي اومي العبي مع اخواتك بس انا كنت برفض بس فالاخر كنت بقوم علشان خفت ماما تكرهني لاني انا حسيت وقتها قد اية ماما كانت بتحبة وماتقدرش تستغنى عنة

وبعدين عددت االسنة دي وبابا جة

بابا تقدري تقولي من النوع القديم شوية ما بيحبش راجل كل شوية داخل على بيتة و الراجل دة كان متعود كل يوم يتغدى او يتعشى عندنا بس لمى بابا جة منع كل دة شوية شوية بس حتى لمى بابا جية ماما كانت بتكلمة والراجل دة بيشتغل في نفس مدرسة بابا وبيكرهو كره

وبعدين عدد السنة كمان وانا شيفة كل حاجة وبسكت واعمل نفسي عبيطة ومش فهمة هيا كانت بتعمل اية واتطور الموضوع و بقا مكلمات بكاميرا ورسائل حب وحاجات كتير

وبعدين الراجل دة انا لحظت قعد مدة ماما ما بتكلموش ولا يكلمها بعدين لقيناة اتجوز وحدة اسمها نفس اسم ماما هو لسة متجوزها السنا دي ولغاية دلوقتي بتكلمو بنفس الطرق اللي قلتلك عليها وبفتح بصدقة لقيت سائل في معناها هيا بتقولو ابتعد وهو بكلامة بيسبتها ويخيها تفضل معاة

انا قريت الرسائل والكلام اللي كاتبه لها كل يدوب اي ست

بس ماما مش من حقها تدوب لانها متجوزة

ولسة امبارح مكلماة في الحمام

قوليلي دلوقتي اعمل اية اروح اواجها لو عملت كدة هتكرهني وتشلي حقد في قلبها وتعملني معملة مختلفة اكيد مش هتبقى معايا زي الاول ولا اروح اقول لبابا بس مش هينفع علشان كدة هبقى اكون دمرت بابا باديا وهندم واقول يارتني كنت سكت

قوليلي اعمل اية وما تقوليش ان العيب من بابا صدقيني انا كنت مفكرة كدة بس هو الاول كان فعلا في مشاكل اول ما جالنا البلد العربى وحصلت عركة كبيرة علشان سببب معين بس بعدها والله بابا اتغير خالص و رجع لطبيعتة ولطيبتة وحتى ماما قالت كدة قالت بابا اتغير خالص

 اعمل اية؟؟؟؟

معلش طولت عليكي في الكلام

___________________________________________________

أنا فعلا مش عارفة اقول لك ايه … و لا قادرة اوصف لك قلبى وجعنى عليكى قد ايه … و بقالى يومين بقرا رسالتك و افكر فى انسب طريقة لمساندتك

اولا: انت مش غلطانة فى حاجة و مالكيش ذنب فى المشاكل القديمة اللى كانت بين مامتك و باباكى و لا ليكى ذنب فى علاقة مامتك بالراجل دا

ثانيا: احنا ربنا لما خلقنا اعطالنا بعض الصلاحيات و منع عنا صلاحيات أخرى. من حق اى واحد فينا انه يحاسب نفسه لو غلط و من حق اى واحد فينا انه يتوب لو اخطأ و من حق اى واحد فينا تقديم النصيحة لو حد طلبها مننا …. لكن مش من حق حد فينا انه يحاسب أو يحاكم والديه و مش من حق اى حد فينا انه ينصحهم من غير اذنهم و مش من حقنا نكرهم أو نحاسبهم على حكاية احنا مش عارفين تفاصيلها و دخائلها

 علشان كدة انا هاطلب منك 3 طلبات

الأول: عدم مواجهة مامتك و عدم اخبار باباكى

الثانى: عدم تحمل ذنب أخطاء الآخرين … زى ما قلت لك فى الأول انت مالكيش ذنب .. يبقى ماتحمليش نفسك فوق طاقتها بالتفكير و التحليل

ثالثا: سامحى مامتك و ادعيلها بالهداية …. ربنا وحده هو اللى يعرف هى ليه عملت كدة و هو وحده اللى يعرف الحكاية كاملة