إلى كل من نصح صاحبة هذه المشكلة بمواجهة والدتها
___________________________________________
انا من عائلة متوسطة و لسة بادرس فى الجامعة
بدأت مشكلتى من عقدة الكذب والخيانة وانا صغيرة لما اكتشتفت حاجة ما كانش المفروض انى اعرفها وانا كنت بنت لسة ف مرحلة ابتدائى وكنا عايشين ف بيت العيلة واكتشتف بالصدفة ان امى وعمى كانو مع بعض. ابواب البيت كانت نصها ازاز ونصها خشب بالتالى اللى كانو واقفين كانو اتنين حاضنين بعض واحنا دلوقتى عزلنا من البيت وامى عرفت انى عرفت الموضوع وزعلت منى جدا وبس الحمد لله ما حدش عرف لان البيت كان ممكن يتخرب
المشكلة دلوقتى ان امى معاملتها معايا مش حلوة
دايما انا اللى وحشة ودايما انا اللى بعمل كل حاجة زبالة
انا بتشتم شتيمة انتى نفسك ما تقدريش تتخيليلها امى عصبية
وحسة انها كرهتنى
عدت عليا السنين اللى فاتت كنت تايهة ومازلت تايهة وبصراحة انا عرفت شباب يعنى خمسة وما حدش فيهم طول معايا بس الحمد لله ما حدش فيهم لمسنى غير شخص واحد بس للاسف لحظة ضعف بس انا لحقت نفسى
وبعدت عنه لظروف انه هو فعلا بيحبنى بس اتخلى عنى وكنت انا عاملة عملية
وما حدش وقف معايا وف مرة كنت انا وهو متخانقين وكان بسبب انه بيتهمنى بانى كذبت ف حاجة غصب عنى من انهيارى اعترفت بكل حاجة خاصة بيا وبالبيت ما كانش قصدى بجد
واتقريت فاتحتى مرة على واحد جارنا وصاحبتى اللى كانت انتيم
هى اللى فرقتنى عنه اخدته منى قابلته مرة وقالت له كل حاجة عنى وخليت صورتى قدامه زبالة
بس الحمد لله كل ده عدى على خير و الموضوع خلص
وانا دلوقتى بقالى اكتر من سنة مرتبطة بشاب كويس جدا بجد اخلاقه ومعاملته معايا وكل حاجة معايا كويسة وانا مخلصة له بمشاعرى وكل كيانى
المشكلة ان الماضى بيطاردنى اللى انا كنت مرتبطة بيه واللى عرف كل حاجة عنى عايز يرجعنى له بالعافية وانا بحب اللى انا مرتبطة بيه دلوقتى و الموضوع جد و كتب الكتاب شهر 8 اللللللى جاى وانا دلوقتى بفيت تايهة مش عارفة اتصرف دى كدة مشكلة
اما امى بقى مشكلتها كبيرة اوى معايا
احنا زى ما قلتلك قبل كدة عزلنا لبيت تانى والبيت ده ف منطقة شعبية
البيوت فيها قريبة من بعض وكل حاجة بتتسمع
لما بتشتم او بتتعصب الناس بتسمع وطبعا اسفة ف اللفظ اوسخ شتيمة انا بسمعها بتتوجهلى
وكذا مرة بابا يتكلم معاها وانا اتكلم معاها ان الموضوع كدة ما ينفعش
لان مرة الناس لقحو عليا بالكلام وقالو دى اللى امها بتقول كذا
وقلتلها كذا مرة انها هتشيل ذنبى بس هى مش عايزة تعرف ده لما هى تقول عليا كلام زبالة الناس لما تسمعه تقول عليا ايه وخصوصا ان ممكن اى حد ييجى يسأل عليا وانا مش عارفة اتصرف
دى كمان مشكلة
انا بقى الايام اللى فاتت دى مريت بظروف وحشة جدا وصلت الى انى كنت مش مستقرة نفسيا
والبنى ادم اللى انا مرتبطة بيه بيحبنى جدا بس انا بغلط ف حقه غلطات مش قصداها
خايفة اكون عملت زى ماما لانى كلمت حد مش المفروض انى اكلمه مع العلم انه عارف ان انا مكتوب كتابى
وانا دلوقتى ببعد عن كل حاجة ممكن تبوظ علاقتى بيه لانى فعلا بحبه ومش عايزة غيره وبجد مش عارفة اعمل ايه
الاول كان ليا تصرفات بصرحاة مش اد كدة
بس انا غيرت من نفسى كتيييييييير بجد انا حسة من جوايا انى اتغيرت
بس اللى حواليا مش عارفين ده او جايز مش حسين بده
انا اللى شجعنى انك كلامك مريح ومن الاخر
اتمنى تلاقىيلى حل
________________________________________________________
تعالى نقسم مشكلتك اجزاء
اولا: صدمتك فى امك و فى عمك
ثانيا: علاقتك بأمك
ثالثا: علاقتك السابقة بالولد اللى عارف كل حاجة
رابعا: علاقتك الحالية
خامسا: الخوف من ان التاريخ يعيد نفسه
_________________________________
أولا …. طبعا الصدمة صعبة و مش سهلة و اكيد كسرت جواكى حاجات كتير منها احترام الاهل و السلطة و الدين و أكيد اهتزت صورة القدوة فى نظرك. الموضوع دا أخد من حياتك سنين و سنين ضاعت فى الغضب و الحزن و الضياع و علاقات فاشلة. قدامك حل من اتنين … يفضل الحال على ما هو عليه و تفضلى بتدفعى تمن الاحساس بالغدر و حياتك تضيع. أو ممكن ترمى ورا ضهرك و نبتدى من أول السطر. ترمى ازاى؟ تكتبى جواب لمامتك و جواب آخر لعمك و جواب أخر لوالدك فيهم كل اللى نفسك تقوليه .. كل اللوم و العتاب و الكراهية و الاحباط و الغضب و كل المشاعر السلبيه الكامنة جواكى. و بعد ما تكتبيه ما تمضيش و حطى كل جواب فى علبة و ارميهم فى النيل … كدة يبقى انت قررتى ترمى الماضى. الخطوة الجاية انك تسامحى .. الله اعلم الظروف ايه و مين السبب .. و ربنا هو اللى بيحاسب العباد
أما عن علاقتك بأمك فسببها مش بس أمك … مامتك كل ما تبص فى عينيكى بتشوف لوم و عتاب و قرف … انت مرايتها الوسخة … لو تفهمتى سبب معاملتها هتعذريها .. انت لو مكانها و بنتك شافت اللى انت شوفتيه هتعملى اكتر من كدة …. لما انت تسامحى و تحتويها و تحضنيها و تبوسى ايدها هتعرف ان انت سامحتيها و حتحبك .. لكن طوال ما هى مش حاسة انك ابنة بارة عمرها ما هتعاملك كويس … انت تحولت من ابنة لضرة
ثالثا: الولد اياه قوى لانك خايفة منه … خوفك هو اللى مقويه … من الأخر انا عايزاكى تضربى طناش … أعلى ما فى خيله يركبه و ما حدش بياخد غير نصيبه
رابعا: احتوى خطيبك و قربى منه علشان حتى لو ايه حصل يفضل معاكى … الغلط بيجيب غلط و العند بيجيب عند و انا مش عازاكى تحمليه ذنوب هو مالهوش صلة بيها
خامسا: التاريخ هيعيد نفسه لو انت ما اتصالحتيش مع الماضى و خططتى لمستقبل مشرق كله حب بدل المشاعر السلبية اللى انت غرقانة فيها
