هاى مروة،انا مبسوطه اوى ان انا بكتبلك عشان انا بحب رايك وبحترمه…….انا ممكن تكون مشكلتى تقليدية بس احب اقولهالك ،واخد رايك……………..
انا(23 سنه) معجبة جدا جدا بابن خالتى (29سنة)..طول عمرى معجبة به…….معجبة بشخصيته،تفكيره، وتربيته…… كل حاجه…….هى شخصية تحلم بيها اى بنت، راجل يعتمد عليه ويتحمل مسؤلية…….. بس الاعجاب ده زاد اوى ممكن تقولى اتقلب لحب من اول السنادى (2009) بدانا نتكلم كتير على (ماسنجر) احنا ماكناش بنتقابل كتير او بنتكلم عشان هو كان عايش فى اسكندرية مع اهله وحتى لو اتقبلنا لما بيجى او لو احنا بنروحلهم بفضل ساكته او لو اتكلمت بيبقى قليل جدا معاه بس……..
زى ماقلتلك بقى………. بدانا نتكلم على النت، اقله على الحاجات اللى مديقانى وهو كمان ونحلها بعض وبنتكلم على كل حاجه فى حياتى وحياته كمان……..وبدات احس منه بشوية اهتمام يعنى بيسالنى فطرت ولا لسه ولو لسه بيزعل شوية ويقولى لازم تفطرى كويس عشان ماتتعبيش وحجات من دى يعتى وساعات كان بيحس ان انا مديقه من غير مااقوله وكان بيسالنى مالك.. انا عارفة انك ممكن تقول لى ان ده عادى عشان هو ابن خالتى وخايف عليا بس انا ماكنتش حاسه بكده………….
وفى مرة ماكنتش اونلاين فلاقيتو بيتصل بيه وبيقولى مش اونلاين ليه فقلتله ان انا تعبانه وماروحتش الشغل فاقلى طبعا الكلام المعتاد سلامتك ولازم تاكلى كويس عشان انا ساعتها كان ضغطى واطى، بس ماتتصوريش مكالمته قد ايه بسطتنى وحسستنى باهتمامه وان انا فارقه معاه ……… اصل ايه اللى يخليه يتصل بيه.. ولاايه….
المهم، فى الفتره دى كنت عارفه انه مسافر(بلد عربى) وكان بيحضر ورقه و كنا بنتكلم فى الوضوع ده وانه متردد وخايف، بس انا كنت بطمنه ويقولى ادعيلى.. وفجاه عرفت انه مسافر بعد 3 ايام … طبعا لكى ان تتصورى احساسى كان ايه ساعتها، اعيط شوية …. اطمن نفسى شويه انه طبعا هايفضل يكلمنى… وفى اليوم اللى كان مسافر فيه اتصلت بيه وحسيت انه مبسوط ……..عايزه اقولك ان انا كالعادة ماقولتش حاجة هو اللى فضل يتكلم انه كان بيخلص شوية حاجات فى الشغل القديم وانه بيسلم على اصحابه ، واعد يقولى خالى بالك من نفسك ويتك عليها ولو فى اى حاجة مديقانى لازم اقوله وماخبيش وقاى فى الاخر (لا اله الا الله) وزى ماانتى بتقولىان دى مش بتتقال الا لو الشخص ده عزيز عليك…… ويمكن قالها عشان بنت خالته… مش عارفة؟؟؟؟؟؟؟؟؟؟؟
بليل حاسيت ان عايزه اكلمه بس قلت ابعتله ماسج احسن قولت فيها( خد بالك على نفسك وياريت لما توصل تطمنى لو عرفت لا اله الا الله) بس ياستى ده كل اللى انا قلته مااعتقدتش انها فيها حاجة واستنيت يرد على الماسج للاسف ماردش…تانى يوم عرفت ان هو وصل بالسلامة من اخوه بس كنت هاموووت واكلمه، فاقولت يمكن الاقيه اونلاين.. وفعلا لاقيته بس اول ماشفنى خرج على طول.. انا طبعا استغربت من تصرفه ده جدا وفى نفس الوقت اتصدمت ……ليه عمل كده؟ يمكن طلع صدفه؟ ماخدتش باله منى؟ مش عارفه…….قولت استنى لبكره اشوف هايعمل ايه وزى ماتوقعت……… عمل كده تانى..
انا دلوقتى عايزه اعرف هو عمل كده ليه؟ هل هو فعلا شاف ان دى الطريقه المناسبه اللى ينهى بيها الموضوع؟؟ وشعورى ناحيته كان ايه بالضبط؟؟؟ حب، ولا اعجاب، ولا مجرد تعود؟؟؟؟؟؟؟ بس انا حسيت منه باهتمام ……… انا خايفه اخسره و مارجعش اكلمه تانى…….. ياريت تقوللى اعمل ايه واتصرف ازاى ، معلش طولت عليكى ..مستنيه ردك، سلام
_____________________________________________________________________________
مش عارفة
مش عارفة هو ليه اتصرف كدة و مش عارفة هل كان فى موضوع اصلا و لا لأ
لكن هقولك تخمينى
بيتهئ لى انه لما كان هنا كان فاضى و محبط و مش لاقى نفسه فكان مسنود عليكى
عاطفيا و نفسيا علشان تطرى الحياة يعنى
و لما سافر هناك و تحت ظل التغيرات و الفرص و صورة المستقبل الباهر حس انه قوى
و لما قوى اول ايد عضها اللى كانت ممدودة له
هيحصل حاجة من اتنين
يا هيتوكس و يتنيل و يرجع يسند عليكى تانى و يقولك الغربة و الضغوط و اسف
يا هيقوى و يقف على رجليه و ينساكى
و ممكن يلعب بديله و ياخد لفة فى البنات اللى هناك و بعدين يرجع و ياخد
المضمونة اللى على الرف
و السيناريوهات كلها وحشة
نصيحتتى .. اعتبريه مرحلة و عدت لأن انت مش حائط المبكى و مش استبن
و لما قوى اول ايد عضها اللى كانت ممدودة له
