انا مخطوبة بقالى 9 شهور وطول فترة الخطوبة كنت بدى مشاعر جياشه بدرجة كبيرة جدا لخطيبى، لدرجة انه بقى بيمل من وجوده معايا لان دايما باتكلم معاه برومانسيه وكلام حلو اوى
المهم اعترف لى انه عقلانى جدا وعملى ومش هايقدر يحبنى بالطريقه اللى انا عايزاها
فقلتله انى هاكتفى بحبى له بطريقتى اللى خزنتها طول السنين دى عشان اللى يستاهلها
بس حتى ماكنش بيقدر مشاعرى تجاهه فبقيت بدى من غير مااخد اى مقابل
والمقابل اللى محتاجاه ده اكيد مقابل معنوى
المشكله انى رومانسيه وعطاءة لدرجة كبيرة فايه الحل اللى يخلينى استحمله لانه شايف انى انا المفروض اللى اتغير مش هو؟ وهل انا بس بضحك على نفسى بانى هاكمل وللا ده ممكن فعلا؟
ارجو الاهتمام بالموضوع بشكل جدى نظرا لاقتراب ميعاد الفرح الشهر الجاى
وشكرا
_____________________________________________
اولا انا بتشكرك جدا للاهتمام برسالتى الاولى وبالرد عليها
ثانيا انا كنت عايزة استشيرك فى حاجة
انا من مميزاتى الابداع والحمد لله فبستغل ده فى عمل مفاجئات للناس اللى حواليا لحد ماقابلت خطيبى
بقيت اعمله مفاجئات الكل بيشيد بيها
المهم من ضمنها يوم عيد ميلاده لما عملت نفسى ناسيه الميعاد بتاع عيد ميلاده وطلب منى يوميها اننا نخرج المهم اصريت اننا ندخل كافيه معين وكنت قبلها بيوم متفقة مع الجارسون انى هاجىانا وخطيبى وجبتله الهدية من قبلها بيوم ووديتها للجارسون
المهم هو خلاص كان اتاكد انى نسيت اليوم ده وقاللى انه زعل
لحد ماجه الجارسون واحنا قاعدين وقدمله الهديه على صينيه وكنت متفقه معاه اشغله الاغانى اللى هو بيحبها
وكان رد فعله متشكر وان اول مرة حد يعمل معايا كدة بس
اما المفاجئه التانية فكانت يوم عيد الحب
ساعتها قررت انى اكون مختلفة عن الغير
لما جانى البيت خليته يطلع يقعد فوق شويه ونزلت ابعثر ورود على عربيته وجواها مكان ماهانقعد وجبت اسبراى رشاش وكتبت على ازاز العربيه من برة اول حرفين من اسمنا
المهم قلتله يوميها ييجى معايا مشوار ورحنا عند رسام كنت متفقة معاه قبلها باسبوع انه يرسم لخطيبى صورة ورحت جبتها انا وهو يوميه بس هو اتفاجىء بيها جدا بس ماكانش له اى رد فعل
واكيد هاتسالى جابلك هديه يوميها وللا لا
وهاقوللك انه نسى اليوم ده
تخيلى احساسى ساعتها
لما اروح واجى لمدة اسبوع
هو اصلا قاللى انه عنده مشكله ف موضوع ردود افعاله ومش بيحب المفاجئات لان الناس بتنتظر منه رد فعل معين هو مش حاسس بيه او مش قادر يديه
كل ده وف النهايه بطلب منك انك تبتكريلى مفاجئه اعملهاله خلال الفترة اللى جايه عشان اشيل الفتور اللى بيننا ويحس بتغيير منى ان كان حتى بمفاجئه
هو بيفكرنى بالبنت اللى كان عندها فقدان ذاكرة كل يوم ومش بتفتكر الا اللى بيحصل معاها ليوم واحد فاضطر حبيبها لابتكار مفاجئات كل يوم عشان تقع ف حبه اكتر واكتر
بتمنى منك حتى لو مفاجئة متجربه قبل كدة
مع العلم ان اصحابى هما اللى بيستشيرونى فى عمل مفاجئات لخطابهم وبتبقى هى هى اللى بعملها وبتنجح نجاح ساحق
ارجو الرد
_____________________________________________
كلامك جميل و انا من الكرسى بتاعى اللى انا قاعدة عليه بقول البنت عداها العيب
لكن هو بقى ممكن يكون مش بحب كدة
بمعنى
كل انسان فينا بيحب بطريقة معينة و بيحب يتحب بطريقة معينة
انت بتحبيه بالطريقة اللى نفسك هو يحبك بيها لكن مش لازم تكون دى الطريقة اللى
هو بيقدرها و بيحبها
الموضوع مش موصوع مفاجآت … الموضوع موضوع فهم
اسمعى كدة
http://www.marwarakha.com/index.php?categoryid=30&p2_articleid=258
http://www.marwarakha.com/index.php?categoryid=30&p2_articleid=257
