عزيزتى مروه انا صاحبه المشكله عملت بنصيحتك وحاولت اعوض النقتتين اللى انتى قولتيلى عليهم وفى يوم حصلت مشكله بينى وبينه بسببها لانى عرفت انه لسه بيكلمها ومسجلها باسم واحد صاحبه واتكلمنا فى المشكله بمنتهى الصراحه وكانت فرصه انى اطلع كل اللى جوايا وهو قالى انه اخر مره هيكلمها وانه حس انه زى اللى كان غرقان فى الرمل وخلاص مبقاش الا خيط رفيع اوى لسه فى الرمل وبيحاول يتخلص منه نهائيا وقالى كمان انه خايف منها لانها مش محترمه وممكن تعمله مشاكل فى الشغل او فى الحياه وانه عاوز هى اللى تسيبه مش هو وهيعمل ايه بقى هيسبها ترن ومش هيرد عليها لاحد هى ما تزهق وانا حاولت اقتنع بكلامه واكدب نفسى انه مش بيكلمها وفى يوم مش عارفه من حسن حظى او العكس اتكلم معاها اكتر من 5 دقائق بس من كتر ما هو مشغول معاها محسش بيا انى وراه وحصلت مشكله تانيه كبيره ونفس الكره انه زعلان من نفسه وووووووو
ونسيت اقولك انهم كانوا متفقين على معاد بيتكلموا فيه الساعه 10 لما جوزها بينزل يصلى وبعدين سافرنا اسكندريه يومين ولاحظت انها مرنتش ولا مره معنى كده انه لسه بيكلمها ومديها خط سيره ومسح اسم صاحبه اللى كان مسجلها بيه وبعدين هو سافر تانى علشان شغله وسابنى انا والاولاد علشان نتفسح والمفاجاه انه بيكلمنى كل يوم 5 مرات وكلام حب ودلع وبيقولى انها بتكلمه وهو مش بيرد عليها بس انا حاسه بينى وبينك انه بيدحك عليا ولسه بيكلمها وانا نفسيتى تعبانه وبحاول ابقى طبيعيه وبالعكس مش بحسسه انى شاكه فيه خالص مع العلم ان الثقه خلاص راحت من عندى ليه قوليلى يا مروه اعمل ايه تانى
___________________________________________________
بصى يا مشمشة هى مجازفة لكن جربى
احنا كلنا عارفيين ان الممنوع مرغوب و ان غيرتك عليه محسساه انه مهم و انك
بتحبيه … المجازفة اللى انا هقولك عليها هتحول علاقته بيها الى مش ممنوع …
انا عايزاكى توافقى و كأنك رميتى طوبته بس فى نفس الوقت حب و دلع علشان ما
يطفششى
هو عامل زى المراهق اللى بيستمتع باحساس انه ضحك على اهله و شرب سجاير من وراهم
اكتر بكتير من استمتاعه بالسجاير نفسها …. قوليله انك عارفة انه لسة بيكلمها
و قوليله انك موافقة و مش فارق معاكى و فى نفس الوقت زودى جرعة الحب و الحنان
… انت كدة بوظتى عليه احساسه بالمتعة المحرمة
رأيك ايه؟
