فيكى حاجات محتاجها وعايزها بس مش عارف مالى

هااى مروه انا عندى مشكله بجد صعيه اوى انا دلوقتى خلصت دراسه وحبيت واحد من سنتين هاحكيلك بقى من الاول انا اتعرفت على الشخص ده فى سنه تانيه عن طريق واحده صحبتى وهى اقرب صاحبه وصديقه هو كان يعرفها من سنه اولى لكن مكنش بيقف معاها بس اول ماعرفتو عليا بدأ يجى ويقف معانا فى الجامعه وكنت بحس دايما انو بيعملنى باختلاف حتى صاحبتى لاحظت ده وكل صحابى البنات قالولى انو بيعملنى بطريقه مختلفه عن اى حد يعنى كان بيخاف اوى يعمل اى حاجه غلط لازعل او اضايق وكمان كان صحابو برده بحس منهم بطريقه غريبه ف المعامله لانو كان اول ماينزل الجامعه ويبقى معانا ميجوش يقفوا معايا يسلمو ويمشوا ولما مش بيبقى موجود بيجوا يقفوا معايا ويتكلمو عايزه اقولك ان هو شخصيه شويه بتغيير اوى وكمان شخصيه كويسه ومحترمه ومكنش ليه ف البنات هو كان يعرف بنات كتير ويقف ويهزر بس كان معايا انا الهزار كان مختلف . المهم خلصت سنه تانيه وجت سنه تالته بدأنا نقرب اوى من بعض وحتى لما كان بيقف معاايا انا وصاحبتى اللى عرفتنى عليه كان دايما يقول انتو اقرب اتنين لياوكان دايما يامروه يقولها انتى زى اختى وعمرو ملمحلى اننا مجرد اصحاب كنت دايما بحس انو فيه حاجه ليه يعنى مفهمتوش غلط بس انا كنت ف الفتره دى بكسف شويه ومكنتش بدى اى فرصه لحد يقرب منى فكنت بعملمو طبيعى جداا على اساس اننا صحاب وبس شاء القدر انو يسافر الترم التانى بره مصر لانو بيلعب رياضه وكان راح للاحتراف قبل مايسافر نزل يومين الجامعه واقعدنا احنا التلاته مع بعض لوحدينا وكنت دايما بحس فى عينه انو خايف يرجع يلقينى ارتبط او حاجه وكنت بشوف فى عينه استنينى بس انا لحد ما كنت مطمناه شويه من الموضوع ده والمهم اتفقنا انا وهو انو يبقى يحاول يدخل على النت ونتكلم ونطمن على بعض وفعلا كنا بنتكلم يامروه مرتين او تلاته ف الاسبوع وكان ف الاولويه انو كان بيدخل يكلم عيلته وانا ده كان اهم حاجه عندو .وقربنا اوى من بعض من ساعه السفر انا حسيت ان فيه حاجه نقصانى وهو كمان حس اننا بدأنا نهتم اوى ببعض خلصت سنه تالته ورجع على بدايه سنه رابعه ف البدايه كان بيعملنى معامله حلوه اوى معامله حد بيحب حد اوى وانا كمان غيرت شويه معملتى بس انا يامروه كنت على طول بكلموه واتصل بيه بس ده مكنش مشكله لانو دايما يقولى مفيش فرق المهم اى حد فينا بيتصل وحتى صحابو كانو دايما بيعتبوه على اساس انو مش بيتصل فكنت شايفه ان ده مش مشكله بالذات انو على طول يقولى مش بحب الموبايل اوى. وبعدين حسيت بتغيير منو بدأت احس انو مش عارفه ايه اللى اتغير لدرجه قلت انو غير رأيو وفعلا وجهتوا وكلمتو فى الموبايل وقلتله انا بالنسبالك ايه قالى انتى اقدر اقول انتيمتى واللى بستريح معاها فى الكلام قلتله بس قالى اه قالى طب نأجل الكلام ده لما ننزل الجامعه واعرف ايه اللى حصل منى وخلاكى تحسى بكده وفعلا نزل الجامعه كان ساعتها ايام الامتحانات بس بصراحه مدتلوش فرصه انو يفتح الموضوع فضلت واقفه مع صحابى وحسيت انو نازل ندمان ومضايق وحسيت انو كان عايز يصلح الموقف اللى قالو بس كانت كرامتى شويه خلتنى مقدرش افتح معاه اى كلام وبعدين جيه الترم التانى فى رابعه ومعرفش ايه اللى حصل ورجعنا تانى قربنا من بعض اكتر من الاول قلت خلاص الموقف بيتصلح لوحدو لكن بردو جيت كلمتو وقلتلو بردو قالى انا مش عايز افتح الموضوع ده تانى وقالى بصراحه انا قلبى حاسس انو بقى جامد وجاحد وقالى انا مش مبسوط انى كده قالى انتى بكره هتنسينى وقالى انا مش بتشدلك ..مش عارفه يامروه ازاى بعد ده كلو مش مشدودلى مع العلم انو متأكد ان فيه كتيير من صحابى يتمنونى وهو عارف كده واقعد يقولى انا فاهم ان اللى بينا يخلى فيه حب قوى وانتى فيكى حاجات محتاجها وعايزها بس مش عارف مالى قالى بكره هتنسينىو كان الكلام ده فى التليفون ومن بعدها مشفتوهوش لان كان ايام الامتحانات بس المشكله اللى حسيتها دلوقتى انى كنت بسيطر عليه وهو مكنش بيحب كده وكنت دايما بحسبوا على كل حاجه الصغيره والكبيره مش عارفه اعمل ايه انا بجد بحبوه اوى وهو اول حب فحياتى وهو عمره مرتبط ياريت تقوليلى اعمل ايه وانا مستعده اتغير عشانو شكراا مروه واسفه لو كانت مشكلتى طويله شويه شكرا

_______________________________________________

اهلا يا جميلة

انا زعلانة علشانك خالص بس لازم تقوى و تجمدى علشان الموضوع يعدى

كلمة مش باتشد لك دى كلمة جامدة جدا … الولد بيعشق بحواسه مش بقلبه … و دا معنى اللى هو قاله .. مخه بيحبك لكن هو مش منجذب ليكى جسديا .. مش متخيلك معاه بالطريقة دى

ممكن يكون فى ولاد تانيين شايفينك جذابة و قمر بس هو مش حاسسها … و هو دا اللى بيخلى ناس يبقوا أنتيم أو يبقوا أحبة …. انا مش عاارفاه لكن انا بنيت تحليلى دا على كلامك و على المواقف

____________________________________________________________

ميرسى اوى يا مروه انك رديتى عليا بجد شكراا اوى ومعلش لو هزعجك تانى

تفتكرى يا مروه لما الواحد يلقى كل حاجه يتمناها فى شخص قدامه يعمل ايه وبالذات لما يبقى اقرب حد ليه كمان

اهو انا بقى فى نفس الوضع ده هو الوحيد اول حب فى حياتى وفيه كل حاجه اتمناها وانا بجد مش قادره احنا بنتكلم على النت وبنقعد زى زمان هو يامروه بيلعب كوره ساعات بقول ان لما الواحد بيلعب رياضه بتخليه ميحسش بأى عاطفه لان دايما الرياضه بتخلى الواحد يقدر يسيطر على عواطفه طب ايه الحل اللى ممكن اخليه يبصلى من ناحيه تانيه وونسيت اقولك على حاجه مهمه ساعات يامروه يقوولى انتى نكد ويقولى بلاش نكد لانى كنت بزعل بسرعه وكنت دايما بحسبه على حاجات كتير ممكن دده يبقى سبب انو بعد بالطريقه دى .
وعلى فكره انا على طول بعجبه فى كل حاجه
طيب الحل ايه بس وهو قالى انا عارف وفاهم كل حاجه انى بحبه حتى انا قلتله طيب انت ليه مصددتش معملتى ليك قالى يمكن دى غلطه منى مش عارفه اخلى فيه امل ولا اعمل ايه …
وازاى بس يامروه اخليه يبصلى نظره تانيه يحس بيا فيها زى ما بتقولى انو بيحبنى بعقله بس اسفه بجد لو هزعجك بس انا بجد معجبه بيكى وبكلامك شكراا

______________________________________________________

انا كان نفسى يبقى عندى اخبار حلوة ليكى

فى موضوع الحب دا بالذات الانطباعات الأولى تدوم … و لو ما فيش شرارة مش هيبقى فيه

لكن

ممكن كمان كذا سنة لما يكبر و يعقل و يتبهدل فى الحب يعرف قيمتك .. لكن دلوقتى هو مستنى الشرارة

صداقتك ليه هتسعده لكن هتعذبك و بكرة ييجى اليوم اللى يقولك فيه انا حبيت و انت هتتكوى من جوة … اعملى لمصلحتك و احمى قلبك و هو الخسران كل الحب دا