انا الحمد لله عايشة حياة عمرى م كنت اتمنى افضل من كدة . انا متجوزة من سنتين انسان بحبه جدا وبينا احترام وتفاهم متبادل .الحمد لله العلاقة بنا افضل مما كنت اتمنى وبحمد ربنا كتير اوى و بتمنى ان العلاقة تدوم كدة على طول وربنا رزقنا ببنت جميلة ومحبوبة من كل الناس الحمد لله.
االحمد لله معنديش مشاكل قوية تقف عندها الحياة بس بعد ما اتجوزت بست شهور مات بابا انا مش هدخل فى تفاصيل بابا كان بالنسبة ليا ايه علشان دى حاجة جوا كل انسان بس اللى عايزة اقولوا انى لحد دلوقتى مش مقتنعه انه مات وانه بس مجرد فى مكان وهيرجع تانى مش اعتراض والله على امر ربنا بس احساس معرفش سببه.
وهو مش موجود معانا حسيت اد ايه احنا كنا معتمدين علية فى كل كبيرة وصغيرة فى حياتنا احنا وماما ودلوقتى حسيت قد ايه ماما مش قادرة تصرف امور حياتها بالظبط زى الانسان الغريق بتدور على اى حد يبقى ليها السند اللى تعتمد علية سواء ابنها او حد من اخواتها او حتى من اعمامى بس مش لاقيه فيهم الحد ده لانها بدور على نفس النموذج من بابا اللى هو اصلا مش موجود
ولما اتجوزت عيشت مع جوزى نفس اللى عشته معا بابا مش مشيلنى هم اى حاجه خالص انا كمان ارتحت ورميت كل حملى علية بس انا نفسى اعتمد على نفسى مش عايزة ابقى نسخة تانية من ماما نفسى اعرف اعتمد على نفسى و مش عايزة بنتى تتربى على كدة انا مش كارهة انى معتمدة على جوزى فى كل كبيرة وصغيرة بالعكس انا حبيت ده جدا بس خايفة انه يجى اليوم و ابقا زى ماما بس مش عارفه اصلح ده ازاى او اعود بنتى ازاى لما تكبر تعتمد على نفسها
