ازيك عملة ايه اتمني ان تكوني بخير
عندي مشكلة و مفيش غيرك ممكن ينصحني انا معندش حد يساعدني خالصصصصصصصصصصصصصصصصص
تقدم عريس لخطبتي جواز صالونات يعني في الاول كنت رافضة بيني و بين نفسي بس كما يقول الناس ده رزق امشي في الطريق و اعملي صلاه استخاره ومشي الموضوع لحد قراءه الفاتحة بس انا كنت اتشدته له او حسيت انه شخص محترم ممكن يديني الامان النفسي و اعتمد عليه خصوصا في هذه الايام مع هؤلاء الرجال بس برده كانت العلاقة بنا بارده مفيش حوار كنت ابقي زي البرابند مع كل الناس اجي معاه ابقي خرساء معرفش ليه كان في بس علي مستوي الشخصيان كنا متوافقين جداااااااااااا المشكلة انه كان شايف اني لازم اكلمة علطول كل يوم و مع الملل في الحوار و خوفي من اسعجاله و الشغل و غيره مكلمتوش فكلم اهلي و لغي الفاتحة اولا انا حاسة اني خسرته بغبائي ثانيا انا حاسة اني ظلمته انا عايزه ارجعه بس مش حقدر اكلمه و لا حد من طرفي ينفع . اعمل ايه انا حتجنن
————————————
انتى مش غلطانة فى حاجة و هو اللى مدب و طربش
بصى يا مشمشة
المشاعر مش بتتطلب
و الاهتمام مش بيتمثل
و السؤال مش بالغصب و الواجب
انتى كنتى مكسوفة و دا طبيعى
هو ليه بقى بسلامته ما قدرش يفتح معاكى مواضيع شيقة و يحكى و يتكلم لحد لما انتى تبقى على راحتك و تقدرى تبقى على طبيعتك؟
هو ليه لما لقى المكالمات بينكم مملة و مش مريحة ماكسرش الملل دا بلطافة و تهريج و كلام خفيف؟
و يعنى ايه المفروض تتصلى؟
ما هو لو انت مش حاسة انك عايزة تتصلى هتتكلمى تقولى ايه؟
و هو لما لغى الفاتحة دا اعتراف منه انه ما اقدرش يوصل لك و ما قدرش يشغل قلبك و عقلك
هو عايز اى واحدة و خلاص
اى واحدة تتصل
اى واحدة تقول كلام حلو
اى واحد تهتم
اى واحدة تمثل دور البطلة اللى هو كاتبه
مش مهم بقى مين الواحدة دى و شخصيتها ايه
ماتبصيش وراكى
انتى مش خسرانة
