اهلا بالجميله مروه رخا
كل التحيه والتقدير والاحترام لك بعد التحيه
مروه انا محتاجك تدينى شويه نصائح علشان انا هشتغل مندوب مبيعات بصى انا بنزل على الشركات
وبعرض عليهم المنتج وباخد منهم كروتهم الشخصيه
وبتعامل معاهم عن طريق انى اروح لشركات تانيه اعرض المنتج وبرضه اديلهم فكره عن طريقه الدعايه بتاعتى
انا بشتغل مع نفسى بس مروه انا بعد اذنك محتاج كام نصيحه اللى هما ازاى اقنع اللى قدامى
مش محتاج كتير انا الحمد لله عندى قبول وربنا بيوفقنى بس محتاج اعرف اكتر انا بشتغل لحساب نفسى
والحمد لله فى طريقى للنجاح
واشكرك جدا
————————————————————–
شوف يا سيدى
فى حاجة اسمها SPIN Selling
ممكن تقرا عنها على النت
و من هنا لحد ما تقرا
الملخص بتاع الطريقة دى هو ان الناس مش بتحب تشترى حاجة مش محتاجينها
و ان مندوب المبيعات دا واحد جاى يدبسهم فى حاجة مش عايزينها
و من هنا بيحصل الرفض و المقاومة
المندوب الشاطر بقى بيتحول لصديق و مستشار شخصى للعميل
و بدل ما تحاول تبيع له منتج و خلاص .. افهمه الاول و افهم احتياجاته من خلال سلسلة من الاسئلة المبنية على بعضها
S = Situation questions
P = Problem questions
I = Implication questions
N = Need Pay-off questions
أول نوع من الأسئلة بتبقى اسئلة عامة بتلم بيها معلومات
فرضنا ان انا عايزة ابيعلك اعلان على موقعى 🙂
الأول لازم اجمع منك معلومات عن شركتك و منتجاتك و جمهورك المستهدف و ميزانيتك للدعاية و الاعلان و تجربتك السابقة – ان وجد – فى الاعلان على النت .. و كدة
و بعد كدة اسئلك عن المشاكل اللى بتواجهك فى الوصول لعميلك من خلال طرق الاعلان العادية و مشاكل الاعلانات فى المجلات و الجرايد و التليفزيون و عيوبها
بعد كدة هطربقها على دماغك و احسسك ان فلوسك دى رايحة فى الهوا و ان ما حدش بيقرا جرايد و لا مجلات و العيال و الشغالات هم اللى بيتفرجوا على التليفزيون و كام واحد من المليون اللى بيقروا الجرنان هيشوفوا اعلانك و كام واحد من اللى شافوه مهتمين و كام واحد من المهتمين هيفتكره و لا هياخد باله و لا و لا
كل دا من خلال اسئلة انت اللى هتجاوب عليها هدفها انى احسسك ان انت عندك مشكلة فى الوصول لجمهورك المستهدف و ان فلوسك بتترمى فى الزبالة
و فى الاخر خالص ارمى لك طوق النجاة … اقدم لك الحل .. الموقع اللى زواره معروفين و مدروسين بالأدلة و البراهين
🙂
الموضوع محتاج منك قراية كتير و ممارسة و انا متأكدة انك هتبقى كويس
🙂
