هو لازم اكون AUC عشان اعرف اشتغل شغلانة محترمة فى البلد دى؟
بيبسى وكوكا كولا وهينكيل وبى &جى … كل دووول اللى فيهم AUC
انا مش صايع انا معايا شهادتين فى التسويق
professional marketing Certify
Management marketing Certify
from American Chamber of Commerce
يعنى بعمل اللى عليا وبحاول اتميز وعندى موهبة كويسة فى الكلام وفى حاجات كتير وعندى بفضل الله حضور كويس واكتر من ممتاز بس فى حاجات غريبة مش عارفاها كل الشركات بتفضل خريج AUC
انا تجارة عين شمس .,عارف انى متعلمتش حاجة بس انا اجتهدت وعلمت نفسى بنفسى وكتر خير ابويا على كده … حاسس ان الدنيا بتتغير انا سنى بيكبر عندى 27 سنة نفسى امسك حاجة
Marwa Guide Me.,Plz
thnx
______________________________
أنا فاهمة كويس اللى انت بتقوله و فاهمة كمان الشركات الكبيرة دى بتفكر ازاى
انا عادة ردودى قصيرة و من الاخر بس النهاردة هرد عليك بالتفصيل لأن دا فعلا موضوع مهم
هابتدى بالشركات المالتيناشونال اللى انت اتكلمت عنها
أولا الشركات دى أغلب التعامل فيها بالانجليزى – الإيميلات و التليفونات و الاجتماعات و ورش العمل لأن الإدارة بتكون أجنبية
علشان كدة خريج الجامعة الأمريكية عندهم فرخة بكشك .. دا معناها انه خريج مدارس لغات و انه بيعرف يقرا و يكتب و يتكلم انجليزى كويس جدا و بلكنة صح و تكوين جمل صح
ثانيا اللى بيشتغل فى الشركات دى بيقضى يومه داخل خارج اجتماعات و presentations
و دى نقطة ضعف تانية فى خريج الجامعات المصرية … احنا فى المدارس متلقيين و فى الجامعات متلقيين و رهبة العرض و التقديم و التحدث امام جمهور كارثة عندنا و فوق دا و دا مهارات الحوار و النقاش و ال argumentative skills مضروبة بالنار
لكن خريج الجامعة الامريكية متعود على الpresentations و بيعرف ازاى يقدم وجهة نظره و يطرحها بكل سلاسة
و ثالثا الشركات دى عايزة واحد مستقل … مش قصدى عايش لوحده لكن قصدى له مخ و منهجية لوحده
و دى كمان عند خريج الجامعة الأمريكية … مافيش عندهم صم و احفظ لكن فى دخول و خروج على المكتبة و كتابة و قراءة ابحاث و منهجية النقد و التحليل
خريج الجامعات المصرية بالكتير عمل له بحث و لا اتنين فى الاربع سنين و كانوا على قلبه زى الهم اللى ما يتلم و غالبا بيستعين بصديق
و رابعا و أخيرا طبعا الشركات دى مش بتاخد اى واحد خريج جامعة امريكية .. بيبصوا على الGPA اللى هو التقدير العام بتاعه و بيختاروا الجاد النبيه المتفوق
و مش بس كدة .. دا بيتعمل له اختبارات ذكاء و تحليل شخصية علشان يعرفوا لو هيعمر معاهم و لا لأ و يستاهل يستثمروا فيه و لا لأ
اللى بتتكلم دى خريجة جامعة عين شمس على فكرة بس انا اشتغلت فى اماكن كتير جدا و فهمت الفرق بين جامعتى و الجامعة الأمريكية … و انا كمان كنت محظوظة لان كلية الالسن على ايامى كان السيكشان بالكتير 40 نفر و الدكاترة كانوا مركزين معانا و أغلب شغلنا فى سنة أولى و تانية كان من المكتبة
انت عملت خير انك بتحاول تطور نفسك و تتعلم و تقف على رجليك
لكن مطلوب منك الآتى
تمسك كل نقطة من اللى انا ذكرتهم فوق دول و تقويهم – ابتداء من الانجليزى
و تكمل دراسات و قراءات فى مجال التسويق – المجال دا فيه تغيرات كتير جدا و الكتب مش لاحقة تواكب التغيير
و تظبط مهاراتك – المهارات اللى انا اتكلمت عنها فوق
و تشتغل فى شركة مصرية و تعمل اسم جامد فى السوق و ساعتها الشركان الكبيرة دى هما اللى هيجروا وراك
يعنى انا علشان اشتغل مع sheraton ابتديت مع pyramiza و علشان اشتغل مع The Ritz-Carlton
نجحت فى شغل شيراتون و علشان اشتغل مع Fairmont عملت اسم جامد مع الريتز
علشان اكتب برا مصر … عملت اسم جوا مصر
الدنيا ماشية كدة
