fbpx
مونتيسوري مصر- تقدمها مروة رخا

ازاى البنت ترشى الولد علشان يحبها؟

 

اولا ازيك و كل سنة و انتى طيبة و يا رب كل سنة تتحققى اللى انتى بتتمنية
 
انا بعد مفكرت كتير و استويت من التفكير بجد محتاجة اخد راى حد بس يكون مش قريب منى يعنى طرف محايد خصوصا ان ارائك دايما جميلة حتى لو متنفذتش بس ليها صدى برضة المهم مش هطول عليكى انا هقولك المشكلة و هقولك برضة وجهة نظرى و انت احكمى بمنتهى الشفافية .
 
انا ارتبطت بواحد من 7/2007 يعنى اكتر من ثلات سنين مش هقولك ان الحياة كانت ظريفة بس بطريقتى و اسلوبى و حبى ليه خليته يتقرب منى قوى و بصراحة ميقدرش يستغنى عنى
 
فى اول معرفتى بيه كنت بالنسبة له زى حب امتلاك حاجة يمتلكها عارف ان مهما حصل هى بتاعته
 
اهلة مش عايزة اقولك هما سبب تعاستى و تعاستة ابوة انسان صعب كلمته تتنفذ حتى لو حساب اى حد و امه كذلك المهم خلاة مرة خطب واحدة قريبته من البلد غصب عنه لان اللى انا بحبة انسان ضعيف برضة و سلبى انا بلوم عليه فى كدة دايما يقولى انتى مش عارفة ابويا ممكن يقاطعنى و يقفل الحياة كلها المهم الخطوبة باظت لان مفيش بينهم اى مشاعر
 
و اثناء الخطوبة على فكرة مكانش قايلى علشان ميخسرنيش و انا عرفت بالصدفة من موبايله لما الموضوع باظ و سامحت و كملت كالعادة
 
غير كذا موقف مع بنات برضة سامحت لانى كنت بالنسبة له مليش زييى و انسانة من ذهب لو قلت لك على اللى انا عملته ليه هتقولى لى عليا هبلة
 
انا كنت بسيب شغلى علشان اقضى له مصالحه علشان ظروفة يمكن كنت بشتغل خدامة لطلباته بس والله بحب انتى مش متخيلة انا بحبة ازاى .
 
بعد كدة كان جايلة سفرية برة و قالى هيسافر يضبط نفسة و بعدين يجى يخطبنى و ياخدنى يعنى يحط اهلة قدام الامر الواقع و ساعتها هيكون معاه فلوس فمش هيبقى محتاج لابوة فى حاجة يذله بيها المهم السفرية باظت و فضلنا زى ماحنا بعدها قالى هاجى اتقدم و هقول لاهلى المهم بعدها لا حس و لا خبر و لا بقى بيفتح الموضوع معاى طبعا اللى عرفته انه لقى هجوم جامد جدا لانى عندى 30 سنة و هو 33 طبعا كبيرة بالنسبة .
 
بعدها بفترة كبيرة ابتدت امور كتيرة مريبة من حواليا كنت حاسة ان فى حاجة بس هو مبيقولش بيقابلنى عادى و بيكلمنى عادى بس انا بحلم كتير بانه هيتجوز و برضة فى حاجات مريبة طبعا من عشرة الثلاث سنين بحس ان فى تغيرات فى حياته
 
المهم قالى بعدها انه خلاص هيتجوز اتارية كان بيجهز نفسة و هو لسة معاى و بيخرج و كل حاجة و انا معاه حتى كان بيكلمها ساعات و انا معاة كل دة علشان مش عايزنى برضة ابعد عنه
 
المهم بهدلته و دعيت علية و على اهلة من قلبى لانهم قهرونى و بعد عنى شهر بعد جوازة بعدها فؤجئت انه بيكلمنى تانى و بعدها كل حاجة بدات تبان
 
انهم هاجموة فى جوازة منى و انا عارفة طبعا انه جبان قصاد ابوة و م شمرتاح فى جوازة لانه طبعا جواز صالونات هلا لا حلوة و لا ست بيت و لا بتعر فتطبخ و فى مشاكل عالطول لان مفيش حب و مفيش راحة
 
بدا يرتبط بيا ازيد من الاول و بصراحة مش هنكر انا برضة حياتى من غير كانى ميتة انا حاولت كتير ارتبط بعدة معرفتش كل انسان بالنسبة لى هو
 
هو بيجرى فى دمى انا مش قادرة اقولك انا بحبه ازاى
 
المهم طبعا بضغطة عليا و اتصالاتة الملحة و يمكن اول مرة يقولى لى بحبك بعد متجوز لانه طبعا حس بقيمة اللى فى ايدة
 
هو كان متخيل انه لما يتجوز هى هتقدر تنسية انا و يعيش زى الناس دلوقت يقولى لى انه عايش ميت و مش مبسوط و انا مش قادر يستغنى عنى و يعيط المشكلة ان مراته حامل يعنى بقى الموقف صعب كتير انه يسيبها
 
المهم النقطة الاهم بقى عرض عليا نتجوز الاول يقول لاهلى بس من غير اهلة ميعرفوا طبعا ابويا مش هيرضى بكدة انا بنته الوحيدة قلت له مينفعش قالى خلاص خليها فى السر لحد مالظروف تتحسن و نقدر نعلن جوازنا طبعا رفضت هو قصدة يعنى يكون ابوة مات مثلا ساعتها مفيش حد هيخاف منه قلت له انا بحبك بس مش هقدر اقبل بكدة يعنى اتنازل عن كل حاجة فرح و شقة و جواز فى العب علشان اية بحبك و انت بقى اتنازلت عن اية انت كدة تبقى كسبت كل حاجة و انا خسرت و افرض خلفت مثلا هيبقى برضة فى السر لحد ماهلة يعرفوا و بعدين طبيعى انه هييجى عليا عالطول لانى انا الثانى و هى الاول يعنى هيقعد معاى مثلا يومين فى الاسبوع او يقعد معاى كل يوم ساعتين و زى مانتى فاهمة ظروف الجواز الثانى
 
لانى انا طبعا اللى بيحبها دلوقت عرف قيمة الحب و عرف قيمة انه يعيش مع واحدة مبيحبها ش ومفيش بينهم اى حب حتى اهله مش بيحبوها لانها مش مريحة ابنهم المهم هو مش بيسبنى لحظة علشان اقدر اهدى و ابعد عنه لانى لو قبلت الجوازة دى هخسر كتير و هو مش هيعرف يعدل هو مدينى فرصة نفكر فيها مع بعض يمكن نقدر نوصل لحل فانا قلت اسال حد طبعا ميعرفناش يقولى لى الحل بس لو قلت لى ابعد عنه حاولت والله كتير و تعبت و رجعت تانى وجودة فى حياتى زى المياة و الهوا رغم انه فعلا ميستهلش اى حاجة لانه انسان انانى سلبى بس بحبة و هو خلاص لو سبته بجد هيموت هيحصل له حاجة قلت له خلينا اصدقاء بس هو مش قادر مش عارفة اعمل اية استنى الظروف تتحسن و بعدين نتجوز و لا انا كدة بضيع سنين تانى من عمرى على الفاضى علما بانى مش قادرة افكر فى حد تانى رغم كل محاولاتى بس فشلت  …. انا طولت عليكى بس دة والله المختصر المفيد ادينى كلمة حلوة او رأى كويس اقدر انفذة
___________________________
 
نفسى اخنقك
او افضل اضرب فيكى لحد ما تفوقى
 
انا زعلانة عليكى جدا جدا جدا
 
اهتمامك بيه خلال التلات سنين اللى فاتوا دول فى تعريفى اسمه رشوة … أيوة .. انتى كنتى بترشيه بالخدمات و الاهتمام و المصالح علشان يحبك و يفضل معاكى
 
و دا يا لوزة ما اسمهوش حب .. دا اسمه بهدلة
 
و بعدين يعنى ايه بتحبيه؟ بتحبيه ازاى و انتى مش بتحترميه؟ سلبى و جبان و ضعيف و كداب و أنانى و مقرف و عيل سيس … بتحبى ايه فيه؟ نفسك ان شاء الله تخلفى منه عيل يطلع شبهه و لا بنت تطلع زيه؟
 
انتى مش بتحبيه
انتى شبطانة فيه
من غير ما تحسى بقى فى حرب بينك و بين اهله على مين اللى هيكسب و يمشى كلامه فى الاخر
من غير ما تحسى بقيتى بتكابرى مع نفسك و مش عايزة تخسرى كل استثمار السنين دى فيه .. صعبان عليكى اللى عملتيه علشانه .. مش قادرة تقولى لنفسك انك اختارتى غلط و استثمرتى فى علاقة غلط
 
و دلوقتى البيه جاى عارض عليكى ايه؟ هيديلك ايه غير جنس … لما هو يقدر و ظروفه تسمح؟
 
انا مش ضد الجواز التانى
 
بس اللى انتى رايحة تتجوزيه دا عيل مش راجل
 

 

من هي مروة رخا؟
مروة رخا: موجهة مونتيسوري معتمدة دولياً من الميلاد حتى 12 عام. Marwa Rakha: Internationally certified Montessori educator from birth to 12 years.

بدأت “مروة رخا” رحلتها مع “نهج وفلسفة المونتيسوري” في نهاية عام 2011 بقراءة كتب “د. ماريا مونتيسوري” عن الطفل والبيئة الغنية التي يحتاجها لينمو ويزدهر. تلت القراءة الحرة دراسة متعمقة للفلسفة والمنهج مع مركز أمريكا الشمالية للمونتيسوري

“North American Montessori Center”