قائمة بمعلمات ومعلمين آدم

قائمة بمعلمات ومعلمين آدم

صباح الخير 🙂 
بناءً على طلب الأمهات، دي قائمة بأنشطة آدم الأونلاين ومقدميها ونبذة عن التجربة.

ملحوظة: 
لازم إيدك بإيد الطفل وخاصة لو كان أقل من 11 أو 12 سنة.
ملحوظة: 
تعلم اللغات بياخد وقت ومجود واستثمار تقريباً مدى الحياة ... يعني مش بيخلص ... مش كام شهر ويقف ... علشان كدة أنا ممتنة جداً لشركائنا في تعلم اللغات ... الكبار والصغار 
ملحوظة:
سن تعلم اللغات:
في نوعين من تعليم اللغات ... نوع بالغمر ... يعني الطفل يقضي أغلب أيامه في بيئة بتتكلم اللغة ... دا من الميلاد ... يعني الطفل من الميلاد ممكن يمتص أي عدد من اللغات في بيئته.
ونوع بالدروس والحصص ... دا لو وجها لوجه من 4 سنوات ولو أونلاين من 6 سنوات أو حسب قدرة الطفل.

أولاً: اللغة العربية (مرتين في الأسبوع كل مرة ساعة) - أحب أسمي النشاط دا تذوق اللغة العربية مع الأستاذة هنا علي. هنا إنسانة ومخلصة وفعلاً بتطلع أحلى ما في آدم.  دي صفحتها
ودا ريفيو مفصل:

هنا شخصية طموحة شغوفة مجتهدة وبتحب تتعلم وتطور من نفسها.
أنا اشتغلت مع آدم لحد ما اتعلم يقرأ ويكتب وكمان اتعلم أساسيات النحو لكن دا مش كفاية ... فين الطلاقة في القراءة ... القدرة على تحليل النصوص ... تذوق اللغة العربية ... مهارة التعبير عن الذات ... طيب والخيال؟
هنا تعرف آدم من وهو أربع سنوات كصديقة لينا لكن أنا طلبت منها تساعدني مع آدم ... من وقت ما هنا اشتغلت مع آدم بطريقتها المختلفة جداً، شفت طفرة كبيرة في طلاقة آدم في القراءة وثقته في نفسه عند التعامل مع نصوص اللغة العربية.
شفت منها تشجيع وحب وفهم عميق ... ركنت المنهج وابتدت تشتغل مع آدم بروحها وحسها ... عارفة كويس نقاط ضعفه وشغالة عليها بطرق مختلفة. انتبهت لنقاط قوته وقدمت له فرصة رائعة لتوظيف شغفه بالكتابة ... أيوة ... آدم ألف وكتب أول قصة قصيرة برعاية وإشراف الأستاذة هنا علي.

اللغة العربية تاني:
آدم بياخد عربي ثلاث مرات في الأسبوع من أستاذ محمود من تطبيق Orcas. الحمد لله ماشي مع منهج الوزارة وحابب اللغة ومستمتع بالتعليم.
ممكن تختاروا المدرسين وفقاً لميزانيتكم واحتياجاتكم من التطبيق نفسه.

ثانياً: اللغة الإنجليزية. (بنحاول تبقى مرتين في الأسبوع لكن جدولنا معتمد على مواعيد المدرس لظروفه الخاصة. كل مرة ساعة) أنا شغالة مع آدم بالمونتيسوري لكن هو لازم يوظف اللي بيتعمله دا. بدأنا مع شاب لطيف جداً لما آدم كان خمس سنين ونص من خلال موقع Verbling - كانت مدة الحصة 20 دقيقة وزادت تدريجياً.
تجربة الموقع دا بالنسبة لنا كانت رائعة لأننا درسنا فيه أكتر من لغة. الشاب دا حالياً بيشتغل في اليابان ومش بياخد طلبة جدد لكن الموقع رائع وممكن تختاروا منه.
كان لنا تجربة على موقع engoo وكانت مخيبة للآمال.
دا ريفيو قديم عن الموقع 

محادثة باللغة الإنجليزية
ودا رابط للمحادثة وممارسة اللغة الإنجليزية مع يوسف الجارحي من خلال Pikado
يوسف أكبر من آدم بكام سنة وعايش في أمريكا والتجربة دي ساعدت آدم مش بس في المحادثة، لأ، كمان في مهارات البحث والعرض.

ثالثاً: اللغة الصينية. (ساعة ونص في الأسبوع) بدأناها على موقع Verbling لكن بعد سنتين، المدرسة فتحت حضانة وبقت مش فاضية. كانت ممتازة وفعلاً أسست آدم صح. لما بدأنا كان آدم خمس سنوات ونص وكانت مدة الحصة 20 دقيقة.
ربنا وفقنا في أستاذة صينية هنا في مصر وبقالنا معها كذا سنة. الحمد لله آدم بقى بيقرا بطلاقة واتعلم رموز كتير وزادت حصيلته اللغوية والدنيا ماشية حلو.
Coco Shi

رابعاً: اللغة الإيطالية. (مرتين في الأسبوع - لمدة ساعة) بدأناها برده على موقع Verbling لما آدم كان 8 سنوات.
اللغة دي سهلة ولطيفة وآدم بدأ يتكلم ويقرأ ويكتب مستوى ثانية ابتدائي في المدة القصيرة دي. المدرسة طلبت مننا كتب معينة وشغالين منها. طبعاً أنا معاه وإيدي بإيده.
دلوقتي شغالين على موقع تاني اسمه italki مع مدرسة جديدة لأن المدرسة الأولى اعتذرت.

المحادثة بالإيطالي مع بنوتة لطيفة جداً اسمها سلمى ... مصرية عايشة في إيطاليا وبتتكلم إيطالي لبلب ... أدب وأخلاق وأمانة ولطافة  لها أختين كمان بيعلموا الأطفال إيطالي ... سما وسارة ... ربنا يحفظهم كلهم 

الدرس مرة في الأسبوع لمدة ساعة ... وحقيقي حاسة بفرق في تطور لغة آدم وثقته في نفسه وهو بيتكلم.

التواصل بيكون مع والدة سلمى للاستفسار والحجز وتظبيط المواعيد.

دا حساب مخصوص اسمه "الثلاث نجمات" للمعلمات الصغيرات: سلمى وسما وسارة. مامتهم "أسماء" هي اللي بترد عليه.

خامساً: الشطرنج. (مرة في الأسبوع لمدة ساعة) بدأنا تعلم الشطرنج من وآدم عنده 6 سنوات من خلال chess your child مع الأستاذة ولاء نبيل وبقيت واحدة من العيلة. حب ودعم وتواصل ومساندة وحاجة ممتازة. الشطرنج فرق مع آدم في مهاراته العقلية وثقته بنفسه. الأستاذة ولاء كمان لايف كوتش للأطفال ... فهي تربوية من الدرجة الأولى. دي صفحتها سادساً: العلوم والتجارب من وآدم عنده 4 سنوات ونصف بدأنا مع ميس إيمان فكري ومركز البيروني. بعد كام سنة ظروفنا اتغيرت وتوقفنا. الحمد لله بعد الكورونا ميس إيمان بدأت تقدم دروس أونلاين ومن ساعتها واحنا راشقين 🙂 ممتعة وعلمية ومحترفة وداعمة لكل طفل. كمان في أستاذ مهند. التجربة معاه مختلفة لكن برده ممتعة. احنا بنشترك في الكورس وهو بيبتع الأدوات ورابط للفيديوهات على النت. نتفرج ونشتغل مع الولاد. دي صفحته سابعاً: البرمجة

عاوزة أعرفكم على أهم مبدأ في حياتي ومنه هدخل في الموضوع .... الصبر حلو 

"اللي فيه عقل وراس يعمل اللي بيعملوه الناس" - المثل دا سمعته من جدتي أم أبويا ومن عمتي ومن أبويا نفسه، لحد ما اترسخ جوايا وبقى جزء من شخصيتي ومحرك أساسي في حياتي - جنب الغضب طبعاً (لما بغضب بنجح ههههههههه).




في مثل كمان مهم أوي:

الشاطرة تمشي وتمد والبليدة تقف وتعد (الشاطرة بتمد علشان تتخطى الصعوبات وتوصل لأهدافها ... البليدة بتعد الصعوبات وتحبط نفسها وتسمع للمحبطين اللي حواليها)نفتكر احنا مش عاوزين نكون إيه .. لا احنا ولا ولادنا ... مش عاوزين نكون ... لا احنا ولا ولادنا ... "كتع كسح كسل"

عاوزة حماسة بقى 

لو دي الحاجة الوحيدة اللي آدم - يا رب يا رب يعني - يورثها مني هكون متطمنة عليه جداً. لكن أنا مش قادرة أعتمد على الوراثة والكلام دا ... إيش ضمنني يعني؟ فقررت أعمل زي ما بتوع المونتيسوري بيعملوا ... بنعمل إيه؟ بنوفر للطفل الأدوات الحقيقية الملائمة لسنه وبيئة ثرية وفرص كتيييييييييييييير للتكرار والتدريب.




دا بقى المثال اللي أنا جاية أحكيلكم عنه. في يونيو 2018، بناءً على ترشيح النابغة الفذ د. محمد زهران، اشتريت لآدم "لعبة" تعلمه البرمجة منها لنفسها كدة. اسمها إيه؟

Kano Computer Kit

Kano Pixel Kit

Kano Motion Sensor Kit

وعلشان احنا مرسوم لنا طريق نمشي فيه، بس ننتبه للعلامات والإشارات، في نفس الوقت اشتركت لآدم في كورس روبوتكس مع شاب لطيف جداً من مركز سمارت تينز اسمه المهندس أحمد حسن - والدنيا مشيت.

Robotics with Smartteens

يعدي كام شهر وعمر ابن عمتي يكلمني عن "لعبة" تانية لآدم علشان شغل الروبوتكس ... بعت اللي بعته ورحت جبتها طبعاً ... كنا بقينا يوم 4 مارس 2019. اسمها إيه؟

LEGO MINDSTORMS EV3 31313 Robot Kit

وجبت دا كمان لكن لسة ما اشتغلناش بيه.




وطلعت هي هي اللي مدرب الروبوتكس شغال بيها وحاجة أخر توافق وتناغم - قطع البازل أهي بتنزل مكانها وتتعشق.




تدخل علينا الكورونا برجلها الشمال ونقعد في البيت ... كل شغلنا المباشر اتلغى. طلبت من المدرب نكمل أونلاين لما لقينا إن الكورونا مطولة شوية. قام المدرب أخد آدم في سكة "سكراتش" ههههههههههه ... دنيا!




في الفترة دي كنت بعت أجيب كتاب يعلمني ويعلم آدم الروبوتكس ... اللي فيه عقل وراس يعمل اللي بيعملوه الناس 

The LEGO MINDSTORMS EV3 Discovery Book (Full Color): A Beginner's Guide to Building and Programming Robots 1st Edition

by Laurens Valk

بعد سنة شغل أونلاين المدرب هاجر كينيا (والله بجد).

فاشتركت لآدم في نادي للمبرمجين تبع اللعبة إياها اللي بتعلم البرمجة مع نفسها.

Kano Club

دي كانت أول مرة أكتشف أن آدم بدأ مشوار التعليم الذاتي .... النادي دا عامل فيديوهات تعليمية قصيرة بالإنجليزي ولما الطفل يتفرج، بينفذ المشروع زيهم وبعدين يقدموا له شوية مشاريع اسمها تحديات وبعدين هو يخترع ويبتكر. طبعاً بيشوف شغل غيره ويتعلم وكمان القائمين على الموقع لما بيلاقوا مشروع متميز بيدوا للطفل شارة أو علامة إن مشروعه عجب القائمين على الموقع.




بعدها بالصدفة اتعرفت على صاحب موقع للمحادثة بالإنجليزي وكمان تعليم البرمجة.

 Pikado

بدأنا برمجة مع أستاذ فذ تاني اسمه المهندس أحمد حافظ وآدم خلص منهج البرمجة اللي بياخد شهور في كام أسبوع - على موقع

Code.org

آدم وقتها كان صغير على لغات البرمجة التانية زي البايثون والجافا مثلاً وهنا كانت إشارة جديدة من السماء .... أنا ماليش في التعليم النظري خالص .... يعني بتعلم مونتيسوري علشان أطبقه وألعب بيه كدة مع ابني ومع الأمهات. آدم بقى بيتعلم برمجة ليه؟ فين المنتج؟ عمل إيه باللي بيتعلمه؟ في نادي المبرمجين هو بيعمل منتجات حلوة لكن أنا عاوزة أكتر .. عاوزة حاجة مفيدة ... حاجة تبل الريق كدة ههههههههههه.




افتكرت "سكراتش" وشغل المهندس أحمد حسن (اللي هاجر كينيا) وبدأت أدعبس .... طلع إن أنا مش مجنونة وإن اللي أنا طالباه دا هو العادي والأصل في الكلام وطلع له اسم كمان ... اسمه إيه؟

classroom enrichment projects.




في الوقت دا آدم كان اتفرج وطبق كل الفيديوهات التعليمية على "سكراتش" وكان جاهز أنه يخترع مشروع يُثري تجربته في التعليم. وقتها كنا في المستوى الرابع من برنامج التعرف على مصر مع مركز ابن بطوطة ... فعمل لعبة لتثبيت معلومات الطفل درسها عن أقاليم مصر.




بعدها بدأ يدرس المخ مع مركز البيروني وانبهر ... فعمل لعبة عن فصوص المخ وأجزاء المخ وكل حاجة مسؤولة عن إيه.




هو دا بقى مربط الفرس .... اللي فيه عقل وراس يعمل اللي بيعملوه الناس ... أهدافي العليا في تعليم آدم أنه يطلَّع قماش .... يطلع منتجات تظهر استيعابه وفهمه وتُثري تعليمه وكمان يفيد غيره من الأطفال اللي هيلعبوا باللعب بتاعته.




ما دام معاه لغة إنجليزية كويسة وقادر يتفرج على فيديوهات تعليمية ويطبق وينفذ ويبتكر يبقى كدة هو تحرر من فكرة الواجب وفكرة المدرس اللي بيقول له المطلوب والتلقين والتنميط والحاجات الكتير دي اللي أنا معقدة منها.




طبعاً هو لسة ما اتحررش تماماً ... وفي عقبات وصعوبات ... ونفسي يتحرر مني أنا شخصياً ويكون رأيه وقراره من دماغه - لكن أنا عارفة إن الموضوع مسألة وقت يعني ومش هيعبرني ههههههههههههه.




أنا مافيش حد في حياتي بيقول لي ورايا إيه ولا أشتغل إيه ولا مسؤولياتي إيه ولا النهاردة هعمل إيه ومع ذلك شايلة شيلتي وشغالة بقوة الدفع الذاتي ... نفسي آدم يبقى كدة ... نفسي يبقى في ناس كتير كدة ... كفاية بقى وضع توفير الطاقة وتقديم الحد الأدنى من كل حاجة!

لحد هنا، كانت إيدي بإيد آدم لكن واحدة واحدة بدأ يستقل لحد ما بقى هو اللي قائد العملية التعليمية وأنا بتابع وبشجع أو بشد وبس. آدم كمل دراسة البرمجة مع أستاذ خالد سعيد هنا ومع الأستاذة أسماء أبو عمرة، مؤسسة منصة "المبرمج الصغير" Little Coder آدم انتهى من كورس تدريب المدربين في مجال البرمجة وحصل على أول شهادة معتمدة في حياته تؤهله لتدريب الأطفال ما بين 4 و12 سنة. الحكاية وتفاصيل دراسة آدم والكورس والذي منه  * اسم الكورس إيه علشان لما تتواصلوا مع الأكاديمية تحجزوه: كورس إعداد المدربين لتعليم البرمجة للإطفال من عمر 4 إلى 12 سنة * هل الكورس للأطفال؟ زي آدم يعني ... هو وقتها كان 11 سنة. الإجابة المختصرة لأ ... للكبار اللي عاوزين يتخصصوا في تعليم الأطفال برمجة حتى لو دا مش مجالهم وعمرهم ما اشتغلوه ... يعني ممكن أي ست أو راجل ياخدوا الكورس ويشتغلوا مدربين ويزودوا دخلهم أو يغيروا مجالهم. * طيب آدم أخده إزاي؟ المهندسة أسماء عملت استثناء لآدم لأنه: ** متعود على التعليم الذاتي، ** مغرم بالبرمجة، ** عمل كورسات قبل كدة من خلال منصة مدرستي وعاوز يعمل تاني، ** بيعرف يدعبس على اليوتيوب ويعرف اللي مش عارفة، ** عنده حافز داخلي لتعلم البرمجة (الكورس 30 ساعة فيديو)، ** وقطع شوط حلو في تعلم لغات مختلفة للبرمجة ** مش هيلاقي صعوبة في متابعة الفيديوهات وفهم محتويات الحقيبة التعليمية اللي فيها كل الأنشطة الورقية والتفاعلية اللي هيحتاجها في الشغل مع الأطفال وتطبيق الأفكار للعب وتنمية مهارات حل المشكلات والعمل الجماعي. * آدم اتعلم إيه بالظبط؟ ** إزاي يعمل فصل لتعليم البرمجة أونلاين. ** الكورسات والمادة العلمية المناسبة لكل فئة عمرية ... يعني 4 سنين غير 6 وغير 7 وغير 12. ** الشغل مع الأطفال على موقع code.org ** الشغل معهم على Scratch JR ** الشغل معهم على Scratch 3.0 ** والجديد خالص بقى مجال التطبيقات على الموبايل App Inventor بعد كدة آدم حصل على شهادة معتمدة جديدة من موقع كورسيرا والاعتماد من جامعة متشنجان في مبادئ HTML5  عاوزة أفكركم إن البرمجة مش هي الطريق الوحيد اللي قدام ولادكم وبناتكم ... مافيش حد بيبدع ويتميز في مجال غصب عنه. دوركم هو تفتيح الأبواب وتقديم تجارب حياتية ثرية والطفل هيلاقي طريقه بأوانه. ملحوظة تانية: ماحدش من الناس الكمل اللي آدم بيدرس معهم سأله عن مدرسته ولا شهاداته ولا تسلسل المش عارف إيه. أخر حاجة ... أنا وآدم عادي بنختلف ونتخانق وبنزق في حدود بعض ... مافيش لا أمومة مثالية ولا طفل مثالي ولا أي حاجة سهلة ومريحة في القصة دي. شوفوا دول كمان .. توثيق لحظات مهمة

Kano Coding

Robotics with Smartteens

Robotics – Lego Mindstorms EV3 31313

تجارب أخرى لطيفة: * كان لنا تجربة لطيفة مع ابن بطوطة في جغرافيا مصر والجغرافيا * النجارة (دي وقفت بعد كام شهر). التواصل مع القائد جعفر من خلال الواتس آب: 01146615640 * للأسف في أنشطة تانية توقفت تماماً زي البيانو والرسم والروبوتكس والتنس والجمباز والسباحة. * في مواقع مفيدة وأهمها لينا كان ألف با تا وخاصة في النحو وأوراق العمل. https://www.alefbata.com/ * في موقع ثاني أنا حبيته جداً لكن آدم بيفضل الشغل العملي https://mysteryscience.com/ * في موقع ثالث رائع لكن للأسف اكتشفت بعد ما اشتركت أن المونتيسوري وأوراقه وأدواته أكثر من كافية ومش محتاجة تدريب أكتر. https://www.matific.com/us/en-us/home/