مراتى و العلبة القطيفة – مشكلة أنا مش هرد عليها

Date posted: April 23, 2010


 
 
 
هاى مروة

ازيك واحشانى جدا

اخبارك ايه ، اتمنى ان الموضوع ده يلاقى اهتمام عندك لانه ممكن يمثل مشكلة لعدد كبير من الاسر فى مصر

مراتى و العلبة القطيفة

ازاى اخرجها منها

ببساطة و من غير تطويل و رغى تجربتى الشخصية أن مراتى بنت مؤدبة خالص مالهاش تجارب نهائى ، طيبة و مؤدبة و بنت حلال و مطيعة و بتعشق التراب الى بمشى عليه و مخلصة لبيتها و بتحبنى يعنى زى ما الكتاب بيقول و انا كمان بحبها و الأهم اهلها ناس طيبين

 

 
لالالا ثانية واحدة

 

كانوا طيبين قبل الجواز و ماطلبوش منى اى طلبات مادية و لكن بعد الجواز اكتشفت انهم سهلوا الطلبات المادية لانهم عايزين يتدخلوا فى بيتى و يحكموه

و طبعا و قفت و عملت غضنفر و حصلت مشاكل و كنت فعلا حاطلقها و هى حامل و لكن والدتى هدت الموضوع و العاصفة عدت

 

و قلت لوالدتها انتوا سبب المشاكل بينى و بين بنتكم و مش حتتدخلوا فى بيتى و قلت لها يا بنت الحلال انا كده و انا راجل خسرت اهلى و انا عندى 16 سنة 
فمش مشكلة و سهلة ننفصل

 

و توصل بنتنا لسن 14 سنة و اخدها على امريكا برنامج اعادة تاهيل تلات اسابيع تنسى امها و انتى عارفة برامج الامريكان

 

و لكن السحابة عدت وهديت تماما و اكتشفت بقى الحقيقة يا مروة و سبب المشكلة 
العلبة القطيفة

 

مراتى اهلها حطوها فى علبة قطيفة و قفلوا عليها و هى مش قادرة تخرج منها نهائيا لسة مش قادرة تقتنع انها ممكن تقول لوالدها لا مادام حاجة فى بيتنا

و سيبك م المكشلة دى

انا حلتها لانى حددت مواعيد الاتصال و تحت رقابة مشددة

حاولت اشد مراتى لملعبى يعنى احببها فى الخروج انها تعمل علاقات تتعلم لغة جديدة البروتكول و الاتيكيت تقرا فى السياسة تقرا مقالاتك انتى شخصيا

 

 
بصراحة فشلت نتيجة الحجة الرئيسية البيت و البنت

 

 

ووالدتى على طول بتدافع عنها 
فبصراحة يا مروة انا حاسس بالندم و ده بمناسبة عيد زواجى الاول الى سياتى كمان كام يوم
 
كان لازم يعنى اتزوج و اقعد مع امى

 

كان لازم يعنى امى الى تختار البنت المودبة اللطيفة

فيها ايه لو كنت خدت بنت مستقلة و عندها تجارب و بتحب السفر و المرح

بس اتصالحت مع نفسى يا مروة

مراتى بحبها و مخلصلها للبيت و لفراش الزوجية لانك عارفانى مش منحرف و مش بغضب ربنا

 

انما احتياجاتى الفكرية و الثقافية كانى اخرج مثلا مع بنت اروح اسمع موسيقى كلاسيك او نخرج نروح ديسكو او نخرج نروح ندوة حادور عليها بره
 
و الاهم مش ناوى اخلف منها تانى ابدا 
كفاية عليا بنوتى 
مستنى رايك مش فى رسالة شخصية 
فى موضوع حلقة 

 

سلاااااااااااام

 

—————————
انا مش عايزة ازود همك

 

بس انت طلبت حاجات فى الزوجة و لقيتها

الغلطة مش فى الزوجة

 المهم انت هتعمل ايه؟

——————————-

شوفى يا مروة عندك حق تماما

انا الى طلبت على اساس المبادىء الى انا نشأت و تربيت فيها و الى اهلى عودونى عليها

و كنت عارف الجانب السلبى الى هى ان مراتى حتبقى بيتوتية اوى

و لكن كان عندى امل انها تتغير انها تحب الخروج و الانطلاق الهادى العاقل مع جوزها و لكن فشلت بصراحة تماما

واضح ان فى حاجة غلط يا فى المبادى الى اتربيت عليها يا اما فى تقديرى للموقف

حاعمل ايه؟

طبعا مش حاعمل حاجة مجنونة الحياة تسير

و علشان الغلط مش فى الزوجة الغلط كان فى تقديرى للموقف مش حاهينها

مش حانهى علاقتى بيها

مش حاخونها

حتى ببساطة يوم اما احب اروح الاوبرا اسمع موسيقى كلاسيك يا حاروح لوحدى يا حاروح مع صديقة او صاحبتى

يوم اما حاحب اروح ماتش كورة حاروح مع صاحبتى او صاحبى

يوم لما حاحب اروح سينما حاروح مع مراتى ( لانها بتبحب السينما

يوم لما حاحب اروح عمرة حاروح مع مراتى

يوم لما حاحب اروح ديسكو حروح مع صاحبتى

حاكمل ماستر فى الجامعة الامريكية لما ارجع لوحدى

حادرس لوحدى

حاربى بنتى زى ما انا عايز على الاستقلال و الحرية المسئولية و انها لا تتعارض مع المبادىء و الاخلاق

طب ما انا والدتى محجبة و متدينة و بتصوم و بتصلى و نفسها تحج و برضه بتبحب الخروج و الانطلاق و الفسح و السفر و نفسها تسافر تركيا و بتموت فى الشوبنج و الهدوم و الديكور و الذوق العالى و اهى ست كبيرة عندها 61 سنة

و لكن امى كده و خالاتى كده و عماتى كده

 

اما مراتى و جيلنا فبجد جيل عجيب يا إما فرى خالص زى الغربيات و ده مش مقبول يا مقفليييييين موتت زى مراتى و ده برضه مش مقبول 
مما يدل يا عزيزتى ان البلد مشوهة نفسيا
Bookmark and Share