في أمهات، وكام أب، الفترة اللي فاتت، بمناسبة خصم ال50%، بعتولي ياخدوا رأيي في الكورسات اللي يشتركوا فيها، واتفاجئوا أني بقول لهم ما تشتركوش! البوست دا هيشرح ليه ما تشتركوش وامتى ما تشتركوش وإيه البدائل.
البدائل
هبدأ بالبدائل: ادخلوا على محرك البحث جوجل، واكتبوا:
* مروة رخا تطبيقات المونتيسوري – هتلاقوا توثيقي لشغل 3-6 و6-12 مع آدم مجاناً.
* مونتيسوري مصر موسوعة تربية الأطفال.
* اكتبوا: دليل التعليم المنزلي
* مروة رخا كروت جسور
* ابحثوا عن صحتك بالدنيا حبيبتي
* اللي عندها أي سؤال تدخل على جوجل وتكتب مروة رخا وموضوع السؤال، غالباً هتلاقي مقال أو فيديو فيه الإجابة.
* قناة اليوتيوب عليها فيديوهات مجانية.
* موقعي عليه مقالات وشغل سنين.
أحب أفكركم إن الموبايل وتصفح أي محتوى تعليمي جاد من الموبايل مقرف ومزعج! أنا شغلي المجاني كتير والروابط بالهبل.
Montessori Egypt – لا لشراء كورسات المونتيسوري
* اللي مش حابة تذاكر وتشتغل مع ولادها أنشطة مونتيسوري وأدوات وكدة، الكورسات هتكون عبء نفسي عليها وفلوس في الأرض.
* اللي عاوزة تفهم نمو الطفل والتربية والفلسفة لكن مش عاوزة أنشطة وأدوات وعاوزة تلاقي إجابات أغلب أسئلتها تشترك في جروب القعدة.
* اللي ولادهم ما بين 13-19، مناسب ليهم التطبيقات التفاعلية كلها ولما أفتح دفعة جديدة من أدوات تمكين اليافعين (زيرو مهارات) عربي وإنجليزي يبقوا يشتركوا.
الذنب
* ما تشتركوش علشان حاسين بالذنب … اشتركوا علشان عاوزين تعملوا ذكريات حلوة مع ولادكم.
* افتكروا إن كل إنسان له طبيعة وقدرات وإن كل أسرة لها ظروف وخصوصية … يعني مافيش صح مطلق وطريق محفور لازم الكل يمشي فيه.
* أخر نقطة … مرجعيتكم في التربية وش ولادكم مش أنا!
بصوا في وش العيال …
اللي وشه مضلم وعينيه مطفيه وكاره حياته بيقول لكم أنتوا مش فاهميني ومش ماشيين صح.
اللي وشه منور وعينيه فيها حماس وحياة بيقول لكم تمام … كملوا.
