هاى مروة انا اثق فيك لذلك ارجوك ردى عليا بسرعة انا فى ثانوية عامة اخر سنة انا اجلت سنة من الثانوية العامة لانى كنت عايزة احصل على مجموع كبير علشان ادخل هندسة لارضى بابا ولكن فى السنة دى اتغير تفكيرى حسيت انى عايزة ادخل كلية حقوق ولكن جامعة القاهرة وهنا المشكلة لانى من الشرقية وبابا رافض جدا بيقول انة مستعد يقعدنى فى البيت لو صممت انا يا مروة مخنوقة عايشة طول عمرى جنب الحيط نفسى ابعد اخد نفسى نفسى اغامر وحس انى حرة بابا تقريبا مخطط لى حياتى لانى الكبيرة
بابا هو دايما كان يجيب كتب ويناقشنى فى القضايا والقانون وانا حسيت انى حبة اساعد الناس لان القانون اقوى سلطة وتعرفى يا مروة ان كل الناس واهلى هاجمونى وقلولى انى ضيعت سنة على الفاضى عشان ادخل كلية الفاشلين ارجووووووووووووووووك يا مروة قوليلى الحقيقة مش الدبلوماسية انا بحب بابا جدا وف نفس الوقت عايزة مستقبلى
————————————
انتى فكرتينى باللى كانوا عايزين يدخلوا كليه طب عشان يعالجوا الناس و يساعدوهم و يخففوا آلمهم
و بعديم لما دخلوا الكلية اتصدموا فى واقع الدراسة و واقع المستشفيات و واقع الوسطة و المحسوبية فى الدرجات و التعيين و واقع السوف اللى مابيقبلش دكتور مش متعين و واقع المستشفيات المقرفة و المرتبات المهببة و المرضى اللى يستاهلوا الحرق عشان جهلهم
حلمك فى الدفاع عن الناس حلم سامى
بس دراسة الحقوق و الشغل و وسط المحاماه فيلم تانى
انا مش باقولك لأ
انا بقولك فكرى و اتكلمى مع طلبة حقوق و اتكلمى مع محاميين و اتكلمى مع الخريجين اللى مش لاقيين شغل
و بعدين قررى
ساعتها هيبقى عندك حجج مقنعة تعرفى تدافعى بيها عن قضيتك قدام باباكى و عيلتك
