استاذتى العزيزه/ مروه
ازيك؟؟؟
انا قررت قرار وانا باكتبلك دلوقتى وانا بابكى والله مش عارفه اعمل ايه بس حبيت اقولك على القرار ده علشان تكونى انت اخر شاهد امام الله على اللى حاعمله ده،
انا قررت اكون انسانه وحشه، قاسيه، جباره، قليله الذوق و معنديش اي حنان اواي احساس بالاخرين، وده كله بسبب الناس انا لاحظت انى كل ما اكون كويسه مع اى حد لازم يكون الحد ده وحش معايا من اول ابويا، حبيبى، اهلى ،اخواتى ، اصحابى ، وقرايبى … كل الناس كل الناس ، انا مش مستنيه اى حاجه من اى حد بس لاحظت ان فيه علاقه طرديه بين انى كل ما اكون كويسه مع حد يقابل ده بسوء المعامله والاهمال و القسوه ،و كل ما احاول امثل دور البنت القاسيه السخيفه اللى مايهماش حد يقابل ده حسن المعامله و الاهتمام والحب و الحنيه، طب اعمل ايه ربنا بيقول اتعملوا مع الناس كويس ان اللى بيعامل بيعامل ربنا والناس بلسان حالها بتقول : انا ماجيش الا بالمعامله الزفت و الاهمال، انا جربت ده وجربت ده وقررت انى اكون انسانه وحشه جدا ، هل انتى معايا فى القرار ده ولا شايفه ان فى حل تانى ؟؟ ، ملحوظه : انا قرات فى كتاب ل د / مصطفى محمود ان طبيعه البشر ما يحس بالحاجه الا لما تقرب تضيع منه ، يعن افضل على طول اهدد كل اللى حواليا باتى حاقلب عليهم واستغنى عنهم ؟؟ و لا افضل موياهم الوش الخشب علشان يعاملونى كويس على فكره دي مش افكار السلبيه ده الواقع اللى بعيشه ومش عارفه اعمل فيه ايه ، بس المشكله دلوقتى اعمل ايه مع كل الناس القريبه منى دى انفذ قراري ولا لأ؟؟؟
انا اسفه للاطاله عليكى بس انا فعلا محتاجه نصيحتك و جزاكى الله عنا كل خير و شكرا
——————————
شوفى يا مشمشة
انا لا هقول لك تنفذى قرارك و لا هحاول ارجعك عنه
أنا هالفت نظرك لكام حاجة يمكن يساعدوكى فى القرار
اولا ما فيش انسان عنده القدرة انه ينقل من اقصى اليمين لأقصى الشمال فى يوم و لا اتنين و لا غيره
ثانيا .. ايه الفرق بين مشمشة الطيبة و مشمشة القاسية؟
أقولك انا بقى … انت لما بتكونى حنينة و طيبة و عطوفة و مهتمة بالناس و بتحبيهم …. بتخنقيهم … بتكتمى نفسهم … بتتحولى الى عبئ عاطفى … صدهم ليكى مش رفض للحب لكن رفض للخنقة و لاعتمادك العاطفى عليهم
لمل بتبقى بعيدة و جافة (بتعريفك انت) بتخدمى العلاقة … ايوة .. بتديهم فرصة يعبروا عن حبهم … بتديهم مساحة يهتموا بيكى … بتديهم سبب علشان توحشيهم
فهمتى يا لوزة؟
حبك و اهتمامك بالناس حرمهم من حقهم فى التعبير عن حبهم ليكى
شوفتى ازاى؟
