هاى مروة .. بتمنى تكوني بخير .. بجد ممنونة ليكي على مساعدتك و ردك على مشاركتي بس معلشى انا مكنتش صريحة شوية في المشاركة اللى فاتت .. أنا يا مروة زي ما قلتلك على قصتي المرة اللى فاتت بس كان ردك إنى أسيبه و أبعد عنه عشان مش مقدرني و محترمني .. هو حقيقى انا حاسه ان الناحية دي غايبة فى العلاقة بس اللى مخليني أكمل معاه اللى بيحصل زى كل يوم في مصر للبنات و اللى أنا مكنتش متوقعة انى ابقا منهم أبدا عشان كان دايما عندى مبادئي و اختياراتي بس انا اتحطيت في الموقف و بصراحة ضعفت فيه واتمنى انك تكوني فاهماني .. فبقا من المرة الأولى انا حسيت خلاص ان مبادئي ضاعت و معنتش حاسه ان ده الشخص ده بقا انا و ازاي حصل كده .. فممكن تقولي بعتها خلاص اتكرر الأمر أكتر من مرة .. مش عارفه ليه انا كنت مش فايقة ولا حاسه بالاتجاه اللى انا ماشيه فيه .. انا الحمد لله بنت متربية و عيلتي بجد محترمة بس اللى حطنى فى الموقف ده حكاية الحب ده عشان بطابعى كنت رومانسية طول حياتي .. و كنت على اساس ان هيكون لينا يعنى مستقبل مع بعض بس كل ما اجى افكر يكون عندى مليوون شك لأن بصراحة حتى لو حصل النصيب مكنتش بعتقد ان هيكون في بركة او هنكون على وفاق دايما .. أبسط كلمة انتى وافقتى قبل كده انا ضامنك ازاي .. فيا مروة أنا حاسه بذنبي دلوقتى و بجد ندمانه بس مش عارفه .. اطنش و اقول ماهى حصلت حصلت و محدش هيعبرني بعد كده ..بس فى احساس بيقولى و من سماعي ليكى كمان انى مقدرش اغير اللى فات و هو ده اللى بيقتلنى بس انا ممكن اغير اللى جاى .. انا مش عارفه يا مروة .. المشكلة انه اه بحبه و حاسه انه جزء من حياتي بس برده عمره الحب ما كان فى ضياع المبادئ … و انا بفكر اقوله خلاص مينفعش يحصل تاني و اذا عايزني بجد عشان قلبي و شخصيتى نكمل لكن اذا مش كده خلاص احسن حاجة نبعد عن بعض .. بس انا مش عارفه اقوله ايه برده بظبط .. انا عارفة انى دوشتك بس ياا مروة بليييييز ساعدينى لان الموقف اللى انا محطوطه فيه ده لا يحسد عليه .. و شكرا ليكى تانى
______________________________________
أنا يا مشمشة و لا هأنبك و لا هاضغط على النقطة اللى انت أضفتيها … واضح انك حاسة بالذنب و مش عارفة تعملى ايه
أنا عايزة أوضح الوقائع قدام عينيكى علشان تعرفى تاخدى قرارك
أولا: انت عندك 16 سنة و نمت مع واحد كذا مرة خلال شهرين و من غير أدنى ارتباط منه
ثانيا: هو كان بيتكلم عليكى وحش بناء على الجزء الأول من المشكلة
ثالثا: برده بناء على الجزء الأول من المشكلة هو اتخلى عنك لما باباكى عرف
رابعا: انت ايدتى كلامى انه مش بيحترمك و لا بيقدرك و اسمحى لى أضيف .. و مش بيخاف عليكى و لا على سمعتك و لا على مستقبلك
خامسا: انت بتقولى انت عيلتك متدينة
من كل الوقائع دى أحب أؤكد لك انه مش هيتجوزك و لا بيفكر فيكى جديا … انت بالنسبة له صغيرة فى السن … مندفعة فى عواطفك … تدين عائلتك ظاهرى بدليل اللى حصل بينكم …. اتكلم وحش عنك و هيتكلم أوحش لو فضلتى تجرى وراه
غير كدة … انت اصلا لسة صغيرة على الجواز … انا مش ضد الحب فى سنك لأن دا طبيعى و بيحصل بس الحب البرئ اللى كله احترام و احلام بالمستقبل و مشاعر فتاة لسة بتستكشف انوثتها … اللى انتى عملتيه بقى مش حب دا و لا بنات الليل اللى عمر ما كان ليهم أهل … انا مش بالومك .. انا بس بافهمك ليه اللى حصل دا حصل … و هيحصل تانى لو ما فهمتيش كلامى.
صاحبتك صاحبة سوء و انا من رسالتك الأولى و فى ردى عليكى لمحت لك بكدة. هى مصاحبة و عايشة حياتها و انت ماشية
وراها و ورا تشجيعها. أهلك كمان ليهم دور فى اللى حصل … معاملتهم و تقفيلهم الزيادة عليكى قطع قنوات الحوار بينكم.
تعملى ايه؟
أولا تسيبيه و تقلبى الصفحة …. جريك وراه لا هيخليكى تتجوزيه و لا هيصلح اللى حصل … جريك وراه هيزود احساسك بالاهانة و الرخص و هيفتح مجال للغلط تانى و تالت
ثانيا فى فرق بين بنت غلطت و بين واحدة لا مؤاخذة … البنت اللى بتغلط بتندم و بتراجع نفسها و بتحكم عقلها و بتقرر انها اغلى من انها تتبهدل. التانية بقى ماعندهاش مشكلة فى اى حاجة او اى حد …. لو دخلتى فى دماغك ان كدة خلاص و ان ماحدش عايزك و لا حد هيتجوزك هتتحولى من النوع الاول الى النوع التانى
مش معنى انك فرطتى فى كرامتك مرة انك لازم تدوسى عليها على طول. ابعدى عن صاحبة السوء و عن الولد دا و ابتدى صفحة جديدة على بياض
الاختيار التانى … هتبقى لا مؤاخذة
