إزاي آدم بقى بيعمل كورسات برمجة؟ فاكرة كويس أول محاضرة آدم يقدمها على منصة مدرستي في كورس البرمجة للمبتدئين بتاعه. أنا فخورة بيه لدرجة تفوق قدرة الكلمات على التعبير. لكن مش هو دا اللي هكلمكم عنه. أولاً هجاوب على سؤال: هو آدم قدم عندهم ولا إزاي بقى مدرب؟ الإجابة لأ وأنا مبسوطة جداً إن الإجابة لأ. الإجابة هي الشغف وفخر الإنسان بشغله! إزاي؟ آدم بيحب البرمجة ولغاتها المختلفة وبقاله فترة بيستكشف ويتفرج على فيديوهات ويطبق مع نفسه. كل ما يتعلم حاجة وينفذها يحكي عنها بكل حب وفخر وشغف وحماس لكل الناس – زمايله في الكورسات، المدرسين، أنا وأبوه، عمتي حبيبتي، كل ما يقابل حد من الجيران .... طوب الأرض ... بحماس وشغف رهيب. من ضمن الناس اللي آدم حكالهم، يوسف الجارحي، دا ولد أكبر من آدم بكام سنة عايش في أمريكا وآدم بيمارس المحادثة معاه من خلال اشتراكنا في PikaDo أبو يوسف الجارحي، د. أحمد الجارحي، هو مؤسس مدرستي. يوسف حكى لباباه على آدم وعرضوا عليه يعمل كورس سكراتش للمبتدئين. ثانياً: أنا كان رد فعلي إيه لما آدم قال لي؟ زعقت! آه والله! زعقت وقلت له لما يبقى يدرس ويتعلم وياخد شهادة إلخ إلخ إلخ كبست الولد يا عيني! المهم لما نمت وصحيت راجعت نفسي وقلت إيه العك اللي أنا عكيته دا! للأسف كلنا متصابين! لعنة التعليم التقليدي ماسكة فيا رغم الكورسات والدبلومات والكتب والمقالات والوعي! بعت لدكتور أحمد قبل ما آدم يصحى وبلغته أني موافقة. اتفقنا أني هاخد جنب والكلام كله والاتفاق والذي منه هيكون مباشرة بينه وبين آدم. ولما آدم صحي اعتذرت له وشرحت له رد فعلي الزفت دا جه منين وبلغته أني موافقة وفرحانة وكدة. ثالثاً: ليه أنا أخدت جنب؟ هو في الواقع الكام شهر اللي فاتوا أنا بقيت متعمدة أخد جنب في حاجات كتير تخص آدم علشان أزود مساحة استقلاله عني وفرصته للتجربة والخطأ في بيئة آمنة .... مهم أوي بيئة آمنة دي! استفادنا إيه؟ * أنه يعمل إنترفيو أو مقابلة علشان شغله يتقييم بعيد عني وعن اللي بجاملوني! أكيد يعني د. أحمد مش هيعمل كورس فاكس على المنصة بتاعته. * أنه يتفق على نظام الشغل وتفاصيله. * أنه يلتزم باللي اتفق عليه – مش كل أجزاء الشغلانة كانت خفيفة على قلبه لكن الراجل بيتربط من لسانه. * أنه يعرض شغله قدام جمهور ... لا هم زمايله ولا أهله ولا مدرسينه. * أنه يفكر في طرق لتحسين شكله وتطويره. * أنه يختار أفكاره وطريقة التعبير عنها. * أنه يتناقش ويتفاوض ويقنع ويقتنع. * أنه ينظم وقته بين دراسته والكورس اللي هيقدمه. * طبعاً جرعة الثقة بالنفس وهرمونات السعادة 😊 ربنا يكلمه على خير ❤
ودي قائمة بأنشطة آدم الأونلاين ومقدميها ونبذة عن التجربة. ودي رحلة البرمجة ودي قنوات آدم التعليمية
One Response